काठमाडौं । गृहमन्त्री रामबहादुर थापा बादलले नागरिकता वितरणमा सरकार सचेत र संवेदनशील रहेको भन्दै अब नागरिकता वितरणमा झन् कडाइ गर्ने बताएका छन् ।
आइतबार संघीय संसदको राज्य व्यवस्था तथा सुशासन समितिको बैठकमा ‘नेपाल नागरिकता ऐन, २०६३ लाई संशोधन गर्न बनेको विधेयक’ माथिको छलफलमा भाग लिँदै उनले राष्ट्रको सुरक्षासँग जोडिएको विषय भएकाले यसको वितरणमा सरकार सचेत रहेको पनि स्पष्ट पारे । उनले भने, ‘नागरिकताका कारण कैयौं राष्ट्रको अखण्डता गुमेको पनि देखेका छौं । त्यसकारण यसमा संवेदनशील हुनुपर्नेछ ।’
उनले विदेशी नागरिकलाई नागरिकता वितरणमा गरिएको चलखेलका बारेमा सरकारले आवश्यक छानबिन गर्ने प्रतिवद्धता जाहेर गर्दै त्यसलाई नियन्त्रण गर्न कडा निगरानी राख्ने चेतावनी पनि दिए । उनले राष्ट्रको विकास, पहिचान र सुरक्षासँग जोडिएकाले यस विषयमा आवश्यक कानुन बनाउँदा सचेत रहन पनि सांसदहरुलाई आग्रह गरे ।
सो अवसरमा समितिका सदस्य झपट रावलले विदेशी नागरिकलाई नेपाली नागरिकता दिएको विषयमा छानबिन गर्न उच्चस्तरीय न्यायिक समिति गठन गर्न सरकारसँग माग गरे । यस्तै, सांसद प्रेम सुवालले ४० लाख विदेशीले नेपाली नागरिकता लिन सफल भएको भनेर भारतीय प्राध्यापकले आफ्नो पुस्तकमा लेखेको दावी गरे ।
सांसदहरु कृष्णगोपाल श्रेष्ठ, जनार्दन शर्मा, पम्फा भुसाल, रेखा शर्मा, यशोदा सुवेदी गुरुङ, वृजेशकुमार गुप्तालगायतले नागरिकता राष्ट्रको भविष्यसँग समेत जोडिएको विषय भएकाले यस विषयमा गहन छलफलको आवश्यकता भएको बताए ।
प्रकाशित मिति: शनिबार, मंसिर १, २०७५ १९:१६