काठमाडौं । निर्वाचन आयोगका प्रमुख आयुक्त अयोधिप्रसाद यादवले निर्वाचनको मिति घोषणा गर्ने अधिकार आयोगलाई दिनुपर्नेमा जोड दिएका छन् ।
शुक्रबार ललितपुरमा आयोजित ‘निर्वाचन पर्यवेक्षणको संयुक्त प्रतिवदेन सार्वजनिकीकरण कार्यक्रम’ मा बोल्दै यादवले यदि सरकारले निर्वाचनको मिति घोषणा गर्ने हो भने निर्वाचनको एक दुई बर्षअघि नैं गर्नुपर्ने बताए । उनले सरकारले हतारमा गर्ने निर्वाचनका कारण आयोगलाई काम गर्न कठिन हुने भएकाले मिति तय गर्ने अधिकार आयोगलाई नैं दिनुपर्ने धारणा राखे ।
उनले आगामी दिनमा निर्वाचनपछि मतदान स्थलमै मतगणना गर्ने व्यवस्था मिलाउन आग्रह गर्दै यसो गर्दा जिल्लासम्म ल्याउँदा लाग्ने ढुवानी खर्च कम हुने र छिटो नतिजा आउने बताए ।
निर्वाचन आयोगका पूर्व प्रमुख आयुक्त निलकण्ठ उप्रेतीले गतबर्षको निर्वाचनमा धाँधली भएको बताए । फोटो सहितको मतदाता परिचय पत्र बनाएपनि त्यसको दुरुपयोग भएको र आँखा देख्ने महिलाहरुको आँखामा पट्टी बाँधेर भएपनि एकै व्यक्तिले २० जनासम्मको मतदान गरेको आफूले पर्यवेक्षणको क्रममा पाएको उनले बताए ।
कार्यक्रममा राज्यव्यवस्था तथा सुशासन समितिकी सभापति शशी श्रेष्ठ, संकल्पकी अध्यक्ष लिली थापा, महासचिव शोभा बस्नेत, जियोकका महासचिव कृष्णमान प्रधान, नियोकका महासचिव डा. गोपालकृष्ण शिवाकोटी, राष्ट्रिय महिला आयोगका सहसचिव युवराज सुवेदी, नर्वेजियन दुतावासकी प्रथम सचिव भिभियान ओप्सभिक, नियोगका अध्यक्ष सुर्यप्रसाद श्रेष्ठले गतबर्ष सम्पन्न निर्वाचनको अवस्थाबारे आफ्नो धारणा राखेका थिए ।
कार्यक्रममा २०७४ को वैशाख, असारमा र असोजमा भएको स्थानीय तहको निर्वाचन र मंसिरमा भएको प्रदेश तथा प्रतिनिधिसभा निर्वाचनको पर्यवेक्षण सम्बन्धी प्रतिवेदन सार्वजनिक गरिएको छ ।
प्रकाशित मिति: बिहीबार, कात्तिक २९, २०७५ १९:१६