काठमाडौँ -जनता समाजवादी नेपाल जसपाबाट सिफारिस भएका तीन जना मन्त्री नियुक्त भएका छन् ।
प्रधानमन्त्री शेरबहादुर देउवाको सिफारिसमा राष्ट्रपति विद्यादेवी भण्डारीले सोमबार मन्त्रिपरिषद हेरफेर गरेकी हुन् । भौतिक पूर्वाधार मन्त्रालयमा मोहम्मद इस्तियाक राई, कृषी तथा पशुपंक्षी मन्त्रालयमा मृगेन्द्रकुमार सिंह र वन मन्त्रालयमा प्रदिप यादवलाई नियुक्त गरिएको हो ।
आइतबार साँझ अध्यक्ष उपेन्द्र यादवले राजेन्द्र श्रेष्ठलाई थमौती गर्दै तीनजना नयाँ अनुहारलाई मन्त्रीमण्डलमा सिफारिस गरका थिए । नयाँ मन्त्री नियुक्त भएसङ्गै भौतिकमन्त्री रेणुकुमारी यादव, कृषिमन्त्री महेन्द्रराय यादव र वनमन्त्री रामसहयाय यादव पदमुक्त भएका छन् । नयाँ मन्त्रीहरूको सोमबार साँझसम्म सपथग्रहण हुने राष्ट्रपति कार्यालयले जनाएको छ ।
यसैबीच, डाक्टर बाबुराम भट्टराई पक्षले पार्टीबाट भएको मन्त्री हेरफेरको निर्णयलाई अस्वीकार गरेको छ । जसपाका अध्यक्ष उपेन्द्र यादवले ‘एकलौटी निर्णय गरेको’ भन्दै भट्टराई पक्षले त्यसलाई कार्यान्वयनमा नल्याउन दबाब दिन आजै प्रधानमन्त्री शेरबहादुर देउवालाई भेट्ने तयारी गरेको छ ।
प्रकाशित मिति: सोमबार, असार २०, २०७९ १३:२६