काठमाडौँ। आज पनि बस्ने भनिएको नेपाल कम्युनिष्ट पार्टी (नेकपा)को स्थायी कमिटी बैठक स्थगित भएको छ । आज बिहान साढे ८ बजे बस्ने गरी तय भएको स्थायी कमिटी बैठक गृहकार्य गर्नुपर्ने भन्दै स्थगित भएको हो ।
प्रधानमन्त्री केपी शर्मा ओलीका प्रेस सल्लाहकार सूर्य थापाले आज स्थायी कमिटीको बैठक नबस्ने जानकारी दिएका हुन् । उनले भने, ‘आज बैठक नबस्ने भयो, एक-दुई दिनपछि बस्छ ।’
बुधवार बसेको बैठकले सर्वोच्चले १३ दिनभित्र संसद् बैठक बोलाउन दिएको आदेशको पूर्ण पालना गर्ने विषयमा केन्द्रित रही छलफल गरिएको थियो ।
यस्तै पार्टीको आन्तरिक विवादबारे पनि थप बहस गर्नका लागि केन्द्रीय कमिटी बैठक बोलाउने र विभिन्न स्थानमा पूर्वनिर्धारित सभाहरूलाई निरन्तरता दिनेलगायतका निर्णय बुधवारको बैठकमा भएको थियो ।
गत पुस ५ गते सरकारले संसद् विघटन गरेपछि सर्वोच्चमा त्यस विरुद्ध १३ वटा रिट परेका थिए । सर्वोच्चले लामो बहसपछि मङ्गलवार ११ गते सरकारको संसद् विघटनको मुद्दा उल्ट्याइ संसद् पुनर्स्थापना गरेको थियो ।
प्रकाशित मिति: बिहीबार, फागुन १३, २०७७ ०९:१४
