काठमाडौँ -नेकपाका अध्यक्षद्वय प्रचण्ड र केपी ओलीबीचको विवाद साम्य हुने कुनै छाँटकाँट छैन। बिबादले दिनानुदिन उग्र रुप लिदै छ। आरोप प्रत्यारोपको बर्षा छ।
आज बसेको सचिवालय बैठकमा पनि यस्तै दृश्य देखियो। ओलीले प्रचण्डलाई लक्षित गर्दै छुट्टै प्रस्तावनै पेश गरे। प्रचण्डले आफुमाथि लगाएका आरोप पुष्टि गर्न लिखित चुनैती समेत दिए।
३८ पृष्ठको उनको जवाफमा उनले अर्का अध्यक्ष पुष्पकमल दाहाल प्रचण्डमाथि प्रतिप्रश्नहरु गरेका छन्।‘तपाईंलाई मेरो चुनौती छ- कि आरोप पुष्टि गर्नुस् र राज्यको कानुन तथा पार्टी विधानअनुसार मलाई कार्बाही गर्नुस्, कि त आफ्नै सहयोद्धामाथि निराधार आरोप लगाएर पार्टी एकता भङ्ग गर्ने धृष्टताको जवाफदेही बन्न तयार हुनुहोस्,' ओलीको जवाफमा उल्लेख छ।
ओलीले प्रचण्डको प्रस्तावलाई पार्टी विभाजनको अनौपचारिक घोषणाको रुपमा अर्थ्याएका छन्। ‘तपाईंको यो ‘प्रस्ताव’ वस्तुतः कुनै राजनीतिक प्रस्ताव होइन, आफ्नै सहयोद्धा अध्यक्षमाथि लगाइएको ‘अभियोगपत्र’ हो र यसलाई अगाडि सारेर तपाईंले वस्तुतः पार्टी विभाजनको अनौपचारिक घोषणा गर्नुभएको छ,' ओलीको भनाइ छ।
ओलीले अलिकति ‘पायक’ परेको हिसाब गरेर कमिटीमा अल्पमत बहुमतको विधि कार्यान्वयन गर्ने वकालत प्रचण्डले गर्न थालेको आरोप लगाएका छन् । ओलीले आफ्नो प्रस्तावमार्फत प्रचण्डलाई जवाफ दिँदै भनेका छन्, ‘सहयोद्धा कमरेडहरुको भावना होइन, टाउका गन्न थाल्नु भएको छ । कित्ताकाट गर्न थाल्नु भएको छ । सम्झिनुहोस् त, केन्द्रीय सचिवालयदेखि स्थानीय कमिटीसम्म अधिकांश ठाउँमा साबिक एमालेको एकजना भए पनि बढी सङ्ख्या छ । बहुमतको त्यो अङ्कगणित तपाईंका विरुद्ध प्रयोग गरिएको भए के हुन्थ्यो ?’विगतमा उनले माथिदेखि तलसम्म मिलाउनका लागि तत्कालीन एमालेबाट त्याग भएको सम्म भन्न भुलेका छैनन् ।
बैठकमा अध्यक्ष ओलीले आफ्नो प्रतिवेदन पेश गर्दै अर्का अध्यक्ष पष्पकमल दाहाल प्रचण्डले यसअघि पेश गरेको प्रतिवेदन झुठको पुलिन्दा भन्दै फिर्ता लिन आग्रह गरेका छन् ।
‘यो झठको पुलिन्दा हो यो तुरुन्त फिर्ता गर्नुपर्छ’, ओलीले प्रतिबेदन पेश गर्दै भनेका थिए । ओलीले बोलेपछि बोलेका कार्यकारी अध्यक्ष प्रचण्डले आफ्नो प्रतिवेदन झुठको पुलिन्दा नभएर यथार्थ भएको भन्दै प्रतिवेदन फिर्ता नगर्ने बताएका थिए ।
त्यसपछि बरिष्ठ नेता झलनाथ खनालले पनि पार्टीको अघिल्लो बैठकमा प्रचण्डले पेश गरेको प्रतिवेदन र अन्य जेजे डकुमेन्ट पेश भएका छन् ती पार्टी सम्पति भएको भन्दै ती कसैले फिर्ता गर्नु भनेर फिर्ता नहुने बताएका थिए ।
प्रस्ताव’ मा प्रस्तुत भाषा शैली र आरोप हेरिसकेपछि सामान्य व्यक्तिले पनि अनुमान गर्नेछन्– बितेको समयमा मैले आफ्नै सहयोद्धा अध्यक्षबाट कस्तो खालको सहयोग र साथ पाएको रहेछु । जुन व्यक्तिको मनमा यति धेरै आक्रोश, आग्रह, घृणा र कुण्ठा अटेसमटेस भएर बसेको छ, त्यस्ता व्यक्तिबाट मलाई सरकार र पार्टी सञ्चालनका क्षेत्रमा कस्तो सहयोग भयो होला?उनले भनेका छन्।
ओलीले शुरुमै प्रचण्डमाथि प्रश्न गर्न शुरु गरेका थिए। ‘कमरेड ‘प्रचण्ड’, सुरुमै तपाईँलाई मेरो प्रश्न छ– पार्टीभित्र चलिरहेको यस वहसको चरित्र के हो ? यो स्वस्थ नीतिगत वहस हो कि ‘वार कि पार’ को लडाइँ ? यो अन्तरविरोध नै हो भने पनि, यो मित्रतापूर्ण हो कि शत्रुतापूर्ण ? तपाइँले रोजेको बाटो वाद–प्रतिवाद–संवादको हो कि वाद–प्रतिवाद र विग्रहको ? एकता–छलफल र अझ उन्नतस्तरको एकतामा हिँड्न खोजिएको हो कि एकता–विग्रह र विघटनको बाटोमा? पार्टीभित्र हाम्रो सम्बन्ध पार्टीका दुई प्रमुख नेताको सम्बन्ध हो कि दुई भिन्न वर्ग र भिन्न पार्टीका प्रतिद्वन्द्वी नेताहरुको ?’
सचिवालय बैठकमा प्रचण्डलाई लगभग ओलीले कब्जा नै गरे। एकोहोरो रुपमा बर्सिएका ओलीले प्रचण्डमाथि प्रश्नै प्रश्नको थुप्रो लगाइदिए। अब यो विवादले कस्तो रुप लिने हो र नेकपालाई कहा पुर्याउने हो भन्नेमा अन्य सचिवालय सदस्य र नेकपाका नेताहरु नै अन्योलमा छन्।
प्रकाशित मिति: शनिबार, मंसिर १३, २०७७ १७:११