काठमाडौँ। नेपाली कांग्रेसका सभापति शेरबहादुर देउवा विरुद्ध पार्टीका वरिष्ठ नेता रामचन्द्र पौडेल समूहले विरोध पत्र दर्ता गराएको छ। पार्टी केन्द्रीय कार्यालय सानेपामा सोमबार दिउसो पौडेल समुहले बिरोध दर्ता गराएका हुन्। विरोध पत्रमा पार्टी पदाधिकारीदेखि केन्द्रीय सदस्यसम्म गरी २७ जनाले हस्ताक्षर गरेका छन्।
शेरबहादुर देउवाले स्वेच्छाचारीतालाई प्राथमिक्ता दिएर लोकतान्त्रिक विधि र प्रणालिको धज्जी उडाएको आरोप विरोध पत्रमा लगाइएको छ। पार्टीको १४औं महाधिवेशनको तयारीमा रहेको कांग्रेसभित्र केही समय अघिदेखि शुरु भएको विभिन्न विभाग विस्तार र गठनलगायत विषयलाई लिएर चर्को असन्तुष्टी पोखिएको छ।
उनीहरूले आफ्ना माग सम्बोधन गर्न पार्टी सभापति देउवालाई एक हप्ते अल्टिमेटम दिएका छन्। १९ असोजमा बोलाइएको पार्टी केन्द्रीय कार्यसमिति बैठक अगाडि सम्बोधन गर्ने तदारुकता नदेखाए विरोध कार्यक्रम शुरु हुने पौडेल समूहको चेतावनी छ।
प्रकाशित मिति: सोमबार, असोज १२, २०७७ १५:३८
