काठमाडौँ । सत्तारुढ नेपाल कम्युनिस्ट पार्टी (नेकपा) काे सचिवालय बैठकले पार्टी एकताका कामलाई पूर्णता दिन अध्यक्षद्वय केपी शर्मा ओली र पुष्पकमल दाहाल तथा महासचिव विष्णु पौडेललाई जिम्मा दिएको छ ।
मंगलबार प्रधानमन्त्री निवास बालुवाटारमा बसेको बैठकले पार्टी एकताका बाँकी काम सक्ने गरी १० दिनभित्र अध्यक्ष र महासचिवले प्रस्ताव ल्याउने र त्यसपछि सचिवालयले निर्णय गर्ने प्रवक्ता नारायणकाजी श्रेष्ठले जानकारी दिए ।
संवैधानिक निकायहरूमा नियुक्ति गर्नका लागि बैठकले प्रधानमन्त्री केपी शर्मा ओलीलाई आग्रह गरेको छ ।
'संवैधानिक निकायमा नियुक्त गर्नका लागि कानुनले नै मापदण्ड बनाएको छ। त्यसकै आधारमा रहेर संवैधानिक परिषद्ले निर्णय गर्छ, 'उनले भने, 'संवैधानिक परिषद्को बैठक छिटो बोलाउन हामीले प्रधानमन्त्रीलाई आग्रह गरेका छौं ।'
उनले आजको बैठक सौहार्द्रपूर्ण रहेको, सरकार र पार्टीको सम्बन्धलाई अझै मजबुत बनाउने बताए ।‘आज सौहार्दपूर्ण छलफल भयो । पाटीभित्रको एकता समझदारी र विश्वासलाई सुद्धृढ गर्ने पार्टी र सरकारको सम्बन्धलाई मजबुत बनाउने, सरकारको कामलाई प्रभावकारी बनाउने र सरकारप्रति विश्वसनीय बनाई अझै बढी सरकारलाई सफल बनाउने दिशातर्फ अगाडि बढ्ने विश्वास र अपेक्षासहित बैठक समापन भयो’, उनले भने ।
यसअघि आइतबार पेरिसडाँडामा बैठक बसेकाे थियाे भने साेमबारकाे बैठक स्थिगत भएकाे थियाे ।
प्रकाशित मिति: मंगलबार, असोज ६, २०७७ १५:४१
