काठमाडौं । नेपाल कम्युनिस्ट पार्टी (नेकपा) काे जारी सचिवालय बैठकमा मन्त्रिपरिषद् पुनर्गठनका विषयमा छलफल भएकाे छ ।
आइतबार पेरिसडाँडामा बसेको सचिवालय बैठकमा मन्त्रिपरिषद पुनर्गठनबारे छलफल भए पनि कुन कुन मन्त्रीलाई हटाएर क–कसलाई पठाउने भन्नेबारे नाममा भने छलफल नभएकाे बताइएकाे छ ।
‘मन्त्रिपरिषद पुनर्गठनबारेमा आजको सचिवालय बैठकमा छलफल भयो,’ बैठकपछि पार्टी प्रवक्ता नारायणकाजी श्रेष्ठले भने, ‘मन्त्रिपरिषद पुनर्गठनबारे नीतिगत रूपमा र मापदण्डबारे छलफल सुरु भएको छ। नामबारे छलफल भएन’
आजको सचिवालय बैठकमा मन्त्रिपरिषद पुनर्गठन लगायत संवैधानिक तथा राजनीतिक नियुक्तिको एजेन्डा पनि छलफलका लागि पेस गरिएकाे छ ।
आइतबार पार्टी एकीकरणपछि पहिलो पटक पेरिसडाँडामा सचिवालय बैठक बसेको हाे।
गत भदौ २६ गते बसेको नेकपा स्थायी कमिटी बैठकले सरकारका काम प्रभावकारी बनाउन मन्त्रिपरिषद् पुनर्गठन गर्ने निर्णय गरेको थियो ।
सचिवालय बैठक साेमबार दिउँसो १ बजे पुनः बस्ने प्रवक्ता श्रेष्ठले जानकारी दिए ।
प्रकाशित मिति: आइतबार, असोज ४, २०७७ १५:२९
