काठमाडौँ । नेपाल विद्युत प्राधिकरणका निवर्तमान कार्यकारी निर्देशक कुलमान घिसिङले आफ्नो पक्षमा सडक प्रदर्शन नगर्न समर्थकहरुलाई आग्रह गरेका छन् ।
कुलमानलाई प्राधिकरणमा पुनःनियुक्तिको माग गर्दै काठमाडौं उपत्यकासहित देशका विभिन्न स्थानमा प्रदर्शन हुँदै आएका छन् ।
घिसिङले शनिबार विज्ञप्ति जारी गर्दै कोरोना महामारीले नेपाल आक्रान्त भएका बेला सडकमा भिडभाड गरेर प्रदर्शन नगरीदिन अनुरोध गरेका हुन् ।
"विश्वव्यापी रुपमा फैलिएको कोभिड—१९ का कारण नेपाल पनि आक्रान्त भएको बेला मलाई प्राधिकरणको कार्यकारी निर्देशकमा निरन्तरता दिनुपर्ने माग राखी महामारीको संवेदनशील अवस्थामा सडकमा भिडभाड गरी प्रदर्शन नगरिदिनुहुन सबैलाई हार्दिक अनुरोध गर्दछु’, कुलमानले भनेका छन् ।
आफ्नो पक्षमा हुँदै आएको प्रदर्शनप्रति उनले गम्भीर ध्यानाकर्षण भएको बताएका छन्। उनले प्राधिकरणको कार्यकारी निर्देशकका लागि सरकारले उचित समयमा आवश्यक निर्णय लिने आशा रहेको बताए ।
प्रकाशित मिति: शनिबार, असोज ३, २०७७ १२:३०
