काठमाडौं । प्रधानमन्त्री तथा नेकपा अध्यक्ष केपी शर्मा ओलीले आगामी ५ दिनमा पार्टीकाे आन्तरिक विवाद सुल्झाउने प्रतिक्रिया दिएपछि नेकपाका नेताहरूले छलफललाई तीव्रता दिएका छन् ।
नेकपा अध्यक्षद्वय केपी शर्मा ओली र पुष्पकमल दाहाल प्रचण्डले बालुवाटारमा छलफल गरेलगत्तै प्रचण्डसहितका नेताले केन्द्रीय सदस्यहरूसँग छलफल गरेका छन् ।
थापागाउँस्थित प्रेसिडेन्टल कलेजमा भेला भएर प्रचण्डसहितका नेताहरूले केन्द्रीय सदस्यहरूसँग पार्टीको विवाद समाधानका लागि सुझाव मागेको बताइएको छ ।
बिहीबार दिउँसो अध्यक्ष प्रचण्ड, वरिष्ठ नेताद्वय माधवकुमार नेपाल र झलनाथ खनाल, प्रवक्ता नारायणकाजी श्रेष्ठसहितका नेताले प्रदेश ५ का केन्द्रीय सदस्यसँग छलफल गरेका हुन् ।
बुधबार साेही कलेजमा प्रचण्ड र नेपाल समूहका नेताले गण्डकी प्रदेशका केन्द्रीय सदस्यसँग छलफल गरेका थिए ।
स्रोतका अनुसार प्रचण्डले प्रधानमन्त्री ओलीसँग भोलि शुक्रबार आज भएको केन्द्रीय सदस्यहरूसँग भएकाे छलफलबारे जानकारी गराउने बुझिएकाे छ।
असार १० मा सुरु भएको स्थायी कमिटी बैठकमा प्रधानमन्त्री केपी ओलीको राजीनामा माग भएपछि आन्तरिक विवाद उत्कर्षमा पुगेकाे छ ।
पार्टीकाे आन्तरिक विवादकै कारण पटकपटक बैठक समेत स्थगित हुँदै आएकाे छ ।
प्रकाशित मिति: बिहीबार, साउन २९, २०७७ १७:४२