काठमाडौं । प्रमुख प्रतिपक्षी दल नेपाली कांग्रेसका प्रवक्ता विश्वप्रकाश शर्माले गाैतम बुद्ध भारतीय हुन् भनी भारतीय विदेशमन्त्री एस. जयशंकरले दिएकाे अभिव्यक्तिप्रति आपत्ति जनाएका छन् ।
सामाजिक सञ्जाल ट्विटरमार्फत उनले जयशंकरकाे अभिव्यक्ति अत्यन्तै दुःखद् भएकाे बताएका छन् ।
'बुद्ध नेपालमा जन्मिएका हुन् भनेर संसारमा कहीँबाट दर्ता प्रमाण हामीले मागेका छैनौं !', उनले लेखेका छन्, 'भारतीय भूमिबाट विगतमा आएका टिप्पणी पनि `नेपाल बुद्ध भूमि हो´ भनेर स्वयं भारतीय प्रम नरेन्द्र मोदीले हाम्रो संसदमा बोलेपछि खारेज भइसकेको हो l फेरि पनि आपत्तिजनक टिप्पणी अत्यन्तै दु:खद् छ l
आवेगको जवाफमा आवेग दुवै देशको हितमा नभएकाे भन्दै शर्मा लेख्छन्, 'राम जन्मभूमिको प्रश्न होस् या बुद्ध जन्मभूमिको, आपसी संवेदनशीलताको हेक्का नराखेर गरिने टिप्पणीले गहिरो चोट छोड्न सक्छन् । मूल बिषय मोड्न सक्छन् । तर दीर्घकालीन हितमा हृदय जोड्न सक्दैनन् l'
भारतीय उद्यमी तथा व्यवसायीहरुको छाता संगठन कन्फडरेसन अफ इन्डियन इन्डस्ट्रीद्वारा शनिबार आयोजित इन्डिया एट ७५ भर्चुअल सम्मेलनमा सम्बोधन गर्ने क्रममा जयशंकरले बुद्ध महान् भारतीय भएको बताएका थिए ।
‘म हाम्रै इतिहासबाट दुई उदाहरण दिन चाहन्छु। अहिलेसम्मका दुई जना महान भारतीय को हुन्? जसलाई तपाईं सम्झन सक्नुहुन्छ?,’ जयशंकरले भनेका थिए,‘म भन्छु, एक जना गौतम बुद्ध हुन्। र अर्का महात्मा गान्धी हुन्। उनीहरू तपाईं हामीजस्ता भारतीयले सम्झने भारतीयमात्र होइनन् बरू संसारले सम्झने महान् भारतीय हुन्। अहिले पनि भगवान् बुद्ध र महात्मा गान्धीका गुण धेरैले सम्झिन्छन् ।’
प्रकाशित मिति: आइतबार, साउन २५, २०७७ ११:२९