काठमाडौं । नेपाल कम्युनिस्ट पार्टी (नेकपा)को आन्तरिक विवाद समाधानका लागि २ अध्यक्ष प्रधानमन्त्री केपी शर्मा ओली र पुष्पकमल दाहालबीच बालुवाटारमा छलफल सुरु भएको छ।
छलफलमा नेकपाका वरिष्ठ नेता झलनाथ खनाल र संसदीय दलका उपनेता सुवास नेम्वाङ पनि सहभागी छन् । यसअघिकाे छलफलमा पनि उनीहरू सहभागी भएका थिए ।
आइतबार र सोमबार २ दिन लगातारकाे छलफलले पनि ओली र प्रचण्डबीच सहमति जुटाउन सकेकाे थिएन ।
प्रधानमन्त्री ओली र अध्यक्ष प्रचण्डबीच साँझ ५ बजेदेखि बालुवाटारमा वर्ता सुरु भएको ओलीका प्रेस सल्लाहकार सूर्य थापाले जानकारी दिए ।
'प्रधानमन्त्री तथा पार्टी अध्यक्ष केपी शर्मा ओली र अर्का अध्यक्ष पुष्पकमल दाहाल ‘प्रचण्ड’ बीच आजको भेटवार्ता सुरु भएको छ। साथमा वरिष्ठ नेता झलनाथ खनाल र संसदीय दलका उपनेता सुवास नेम्वाङ पनि सहभागी हुनुहुन्छ,’ थापाले ट्विटरमा लेखेका छन् ।
पार्टीकाे आन्तरिक विवादका कारण गत असार १० गतेदेखि जारी स्थायी कमिटी बैठकसमेत पटकपटक स्थगित हुँदै आएकाे छ।
प्रकाशित मिति: मंगलबार, साउन २०, २०७७ १७:४८
