काठमाडौँ । नेकपा अध्यक्ष एवं प्रधानमन्त्री केपी शर्मा ओलीले पार्टीमा केन्द्रीय कमिटी बैठक बोलाउन गरिएको मागप्रति असन्तुष्टि व्यक्त गरेका छन् ।
कोरोना भाइरसको नियन्त्रण तथा रोकथाका लागि प्रतिपक्षी दलका नेताहरुसहित विज्ञहरुसँगको छलफलका क्रममा मंगलबार बिहान प्रधानमन्त्री ओली संकटको बेलामा आफ्नै पार्टीका नेताहरु गैरजिम्मेवार बनेको बताएका हुन् ।
प्रधानमन्त्री ओलीले नेकपाकै नेताहरुले कोरोना भाइरस संक्रमणको जोखिमलाई गम्भीर ढंगले नलिएको गुनासो गरे । उनले आफ्नै पार्टीका नेताहरु मुलुकको संकटप्रति लापरवाही, जनताप्रति उदासीन हुँदै स्वार्थका पछाडि कुदेको टिप्पणी गरे ।
सरकारले संक्रमणको जोखिम फैलिन सक्ने भन्दै २५ जनाभन्दा बढी जम्मा नहुन निर्देशन दिएका बेला पार्टीभित्रैबाट केन्द्रीय कमिटी बैठकको माग भएपछि प्रधानमन्त्री ओलीले त्यसप्रति असन्तुष्टि व्यक्त गरेका हुन् ।
'केही मानिस र केही सञ्चारमाध्यममा अत्यन्तै गैरजिम्मेवारपन देखिन्छ । यथार्थमा भन्दा अन्त बुझ्न गइरहन पर्दैन मेरै पार्टीमा देखिन्छ । सरकारले २५ जनाभन्दा बढी भेला नहुन भनेको छ । तर मेरै पार्टीमा ४५० जनाको केन्द्रीय कमिटी तुरुन्त चाहियो भनेर कहाँ बस्ने हो ? के गर्ने हो ? त्यस्तो सोच केही पनि छैन', उनले भने, 'तर बैठक चाहिँ चाहियो भन्ने कुरा त मेरै पार्टीमा छ । स्थायी कमिटी अहिले नै बस्नुपर्यो, भरे बस्नुपर्यो त्यसबाहेक केही छैन ।'
केही सञ्चार माध्यमहरुले सरकारका जुनसुकै कदमप्रति विरोधको शैली अपनाएको ओलीले बताए । विज्ञहरुले समेत सरकारका काम कारवाहीप्रति असन्तुष्टि जनाइरहेको बेला प्रधानमन्त्री ओलीले टेलिभिजनको पर्दामा सरकारलाई नखोज्न आग्रह गरेका छन् ।
ओलीले भने- 'यस्तो महामारीमा पनि विरोध मात्रै गर्ने । अनि मान्छेहरु उचाल्ने ।' उनले जनताको जीवनभन्दा अरु ठूलो कुरा केही नभएको बताए। जनताको जीवन रक्षा गर्न सबै लाग्नुपर्ने उनको भनाइ छ।
यसैबीच प्रधानमन्त्री ओलीले कोरोना नियन्त्रणका लागि विज्ञहरुबाट प्राप्त सुझावलाई कार्यान्वयनमा लैजाने प्रतिबद्धता जनाएका छन् ।
प्रधानमन्त्रीका प्रेस सल्लाहकार सूर्य थापाका अनुसार सुझावहरु एकै खालका नभएको तर समग्रतामा कोभिड समस्या बढिरहेको सन्दर्भमा मिश्रित सुझाव प्राप्त भएका थिए ।
तराईका, वीरगन्ज, नेपालगन्ज, विराटनगर लगायतमा समस्या देखिएको तथा काठमाडौँमा समेत पछिल्लो समय संक्रमित बढेको अवस्थामा विज्ञका सुझावलाई महत्त्वपूर्ण रुपमा लिने र कार्यान्वयनमा लैजाने निष्कर्ष निस्किएको थापाले जनाए ।
साउन ७ गतेदेखि लकडाउन हटेपछि कोरोना संक्रमण दर बढेको छ । काठमाडौं उपत्यकामा निजी तथा सार्वजनिक साधनको निर्वाध सञ्चालन भएपछि र होटल रेस्टुरेन्ट खुला गरेपछि संक्रमण झन् बढेको विज्ञहरुकाे बुझाइ छ ।
प्रकाशित मिति: मंगलबार, साउन २०, २०७७ १६:२१