काठमाडाैं । कोरोना भाइरसको प्रकोप बढ्दै गएका नियन्त्रणका लागि जनस्वास्थ्य क्षेत्रका विज्ञहरूले लकडाउन गर्न र आवश्यक परे कर्फ्युसमेत लगाउन सुझाव दिएका छन् ।
मंगलबार प्रधानमन्त्री निवास बालुवाटारमा भएको विज्ञहरूसँगकाे छलफलमा प्रधानमन्त्रीलाई यस्तो सुझाव दिइएकाे हाे ।
संक्रमणको जोखिम उच्च रहेका स्थानमा लकडाउन वा निषेधाज्ञा जारी गर्न सुझाव दिएका थिए । तर पहिले जस्ताे देशैभर एकैपटक लकडाउन भने गर्न नहुने उनीहरूकाे धारणा थियाे ।
सार्वजनिक सवारी साधनमा पनि स्वास्थ्य मापदण्ड पूर्ण रूपमा लागू गराउन स्वास्थ्यविज्ञले आग्रह गरे ।
विदेशबाट आउनेहरूको अनिवार्य पिसिआर परीक्षण गर्नसमेत स्वास्थ्यविद्हरूले धारणा राखेका थिए । यसका साथै स्वास्थ्य क्षेत्रका तयारी तीव्र पार्न र अस्पतालहरूमा आइसियु र भेन्टिलेटरको संख्या समेत बढाउनुपर्ने सुझाव दिएका थिए ।
वीरगन्ज, विराटनगर, काठमाडौं लगायतका सहरहरूमा कोरोना भाइरसको प्रकोप बढ्दै गएको सन्दर्भमा प्रधानमन्त्री ओलीले लकडाउन गर्ने/नगर्ने विषयमा विज्ञहरूसँग छलफल गरेका हुन् ।
छलफलमा प्रमुख विपक्षी दलका नेता शेरबहादुर देउवा,जनता समाजवादी पार्टीका अध्यक्ष महन्थ ठाकुर, कोभिड-१९ संकट व्यवस्थापन केन्द्र(सिसिएमसी)मा रहेका मन्त्रीहरू र जनस्वास्थ्य क्षेत्रका विज्ञहरू सहभागी थिए ।
छलफलमा भाग लिँदै नेपाली कांग्रेसका सभापति शेरबहादुर देउवाले सीमा नाकामा कडाइ गर्न सुझाव दिए । नेपाली नागरिकको उद्धार गर्ने बाहेकको स्थितिमा सिमानाको आवागमनमा कडाइ गर्न उनकाे सुझाव थियाे ।
यस्तै देउवाले आरडिटी परीक्षण अन्त्य गर्दै एक प्रदेशमा १ लाख नयाँ परीक्षण तत्काल गर्ने गरी बन्दोबस्त गर्न, स्वास्थ्य सामग्रीको पर्याप्त प्रबन्ध, अत्यावश्यक औषधि रेमडिसिभिरको आयातमा तदारुकतासँगै आइसोलेसन वार्ड र भेन्टिलेटर प्रवन्ध गर्न पनि सुझाएका छन्।
प्रकाशित मिति: मंगलबार, साउन २०, २०७७ १६:१०