काठमाडौं । प्रधानमन्त्री केपी शर्मा ओलीले प्रतिपक्षी दललाई कोरोना भाइरसको महामारीलाई विरोध गर्ने अवसरका रुपमा नलिन आग्रह गरेका छन् ।
मंगलबार कोरोना संक्रमणको जोखिम र नियन्त्रणका उपायबारे छलफल गर्न विज्ञ र राजनीतिक दलका नेतासहित बसेकाे बैठकमा प्रधानमन्त्री ओलीले संकटलाई विरोध गर्ने अवसरका रुप लिन नहुने धारणा राखेका हुन् ।
बैठकमा प्रधानमन्त्रीले भने, ‘यता पल्टाएर पनि विरोध, उता पल्टाएर पनि विरोध । कहिले लकडाउन किन भनेर विरोध । कहिले लकडाउन खोलेको भनेर विरोध । महामारी सबैको चुनौती हो, कसैले पनि यसलाई विरोधको अवसर ठान्नु हुन्न ।’
महामारी नियन्त्रण गर्न सरकारले गर्ने कामले मात्र नपुग्ने भन्दै जनतामा बढेको चेतनामै सबै कुरा निर्भर हुने प्रधानमन्त्रीले बैठकमा बताएको ओलीका सञ्चारविज्ञ रामशरण बजगाईंले बताए ।
यसैबीच बैठकमा सहभागी प्रमुख प्रतिपक्षी दल नेपाली कांग्रेस सभापति शेरबहादुर देउवाले लकडाउन गर्ने, नगर्ने कुरा समुादयमा संक्रमणको स्तर हेरेर निर्धारण हुनुपर्ने बताए ।
उनले हरेकलाई सामाजिक दूरी कायम गर्न र मास्क अनिवार्य लगाउन कडाइ गर्नुपर्ने भन्दै मुख छोपेर हिँड्न बानी पार्नुपर्ने बताए ।
देउवाले कोरोना नियन्त्रणमा सरकारले आफूहरुले दिएको सुझाव अनुसार काम नगर्दा भयावह स्थिति आउन लागेको भन्दै सरकारका कामकारवाही प्रभावकारी हुन नसकेको बताए ।
बैठकबाट बाहिरिने क्रममा बालुवाटारमा सञ्चारकर्मीहरुसँग छोटो प्रतिक्रिया दिँदै सभापति देउवाले काम गर्ने सरकारले नै भएको बताए । 'दिएको सुझाव नमान्ने । अनि फेरि सुझाव लिन किन बोलाउनुपर्यो ?’, देउवाले प्रतिप्रश्न गरे ।
उनले सरकार कोरोना र बाढीपहिरो नियन्त्रण तथा राहत र उद्दारमा खटिनुको साटो सत्ताको खिचातानीमा मात्रै रमाउने गरेको बताए ।
प्रकाशित मिति: मंगलबार, साउन २०, २०७७ १४:११