काठमाडौं । सत्तारुढ दल दल नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्ड र उपाध्यक्ष वामदेव गाैतमबीच मंगलबार बिहान भेटवार्ता भएकाे छ ।
पार्टीभित्र देखिएको विवाद समाधानका लागि प्रधानमन्त्री एवम् अध्यक्ष केपी शर्मा ओलीसँग छलफल गर्नुअघि अध्यक्ष प्रचण्डले गौतम निवास भैंसेपाटी पुगेर छलफल गरेका हुन् ।
२ नेताबीच करिब ४५ मिनेट छलफल भएको थियो । भैंसेपाटी स्रोतका अनुसार भेटमा बामदेवले प्रस्तुत गरेको ६ बुँदे प्रस्तावबारे समेत छलफल भएको थियो ।
प्रचण्डले प्रधानमन्त्री ओलीसँग लगातार छलफल गर्दा पनि विवाद समाधान हुन सकेकाे छैन । गत आइतबारबाट सुरु भएको अध्यक्षद्वयबीचको छलफल आज पनि जारी रहने छ । बालुवाटार स्राेतका अनुसार वरिष्ठ नेता झलनाथ खनाल र नेकपा संसदीय दलका उपनेता सुवास नेम्बाङसहित मंगलबार बेलुका ५ बजे हुने २ अध्यक्षबीच छलफल हुने छ ।
१३ साउनमा गौतमले विवाद समाधानका लागि भन्दै ६ बुँदे प्रस्ताव सार्वजनिक गरेका थिए । साे प्रस्तावमार्फत गौतमले ओली एकता महाधिवेशनसम्म अध्यक्ष नै रहने र प्रतिनिधिसभाको बाँकी कार्यकालसम्म प्रधानमन्त्री नै रहने उल्लेख छ । यसैगरी अर्का अध्यक्ष पुष्पकमल दाहाललाई भने पार्टीमा कार्यकारी अधिकारसहितको अध्यक्ष दिइनुपर्ने प्रस्ताव गाैतमकाे छ ।
प्रकाशित मिति: मंगलबार, साउन २०, २०७७ १३:०६