काठमाडौं । समुदायमा काेराेना संक्रमण फैलिएसँगै नियन्त्रणका लागि प्रधानमन्त्री केपी शर्मा ओलीले जनस्वास्थ्य विज्ञहरूसँग परामर्श सुरु गरेका छन् ।
मेडिकल एसोसिएसनका अध्यक्षलगायत जनस्वास्थ्यका क्षेत्रमा क्रियाशील विज्ञहरूलाई बालुवाटार निवासमा बोलाएर प्रधानमन्त्री ओलीले परामर्श गरिरहेको प्रेस सल्लाहकार सूर्य थापाले जानकारी दिए ।
थापाका अनुसार २० जनाभन्दा बढी विज्ञहरु सहभागी छलफलमा प्रधानमन्त्रीले संक्रमण बढिरहेकाले लकडाउन गर्ने कि अन्य विकल्पमा जाने भन्नेबारे सुझाव लिइरहेका छन् ।
छलफलमा विज्ञहरूसँगै प्रमुख प्रतिपक्षी दलका नेता शेरबहादुर देउवा, जनता समाजवादी पार्टीका अध्यक्ष महन्थ ठाकुर लगायत पनि सहभागी छन् ।
जनस्वास्थ्यविज्ञसँग प्रधानमन्त्रीको यो दोस्रो चरणको छलफल हो । यसअघि पनि लकडाउन खुकुलो बनाउन र परीक्षणलाई प्रभावकारी बनाउन प्रधानमन्त्रीले विज्ञसँग परामर्श गरेका थिए । मंगलबारको छलफल यसैको निरन्तरता भएको स्रोतले जानकारी दियो ।
प्रधानमन्त्री ओलीले गत जेठ २१ गते यस्तै परामर्शको आयोजना गरेका थिए । त्यतिबेला विज्ञहरूले क्वारेन्टाइनको सुधार, परीक्षणको दायरा बढाउन सुझाव दिएका थिए ।
प्रकाशित मिति: मंगलबार, साउन २०, २०७७ ११:५६