काठमाडौं । सत्तारूढ दल नेपाल कम्युनिस्ट पार्टी (नेकपा) का अध्यक्षद्वय केपी शर्मा ओली र पुष्पकमल दाहालबीच साेमबार पनि छलफल जारी छ ।
बालुवाटार स्रोतका अनुसार सोमबार बिहान ९ बजेपछि सुरु भएको छलफलमा नेकपाका वरिष्ठ नेता झलनाथ खनाल र संसदीय दलका उपनेता सुवास नेम्वाङ पनि सहभागी छन् ।
आइतबार भएकाे छलफलमा पनि खनाल र नेम्वाङ सहभागी थिए । तर करिब ३ घण्टा वार्ता भए पनि कुनै सहमति भएको थिएन । आइतबार छलफललाई निरन्तरता दिने सहमति गरेर उठेका नेताहरू आज पनि छलफलमा जुटेका हुन् ।
प्रधानमन्त्री ओली महाधिवेशन गराएर पार्टीको विवादलाई निकास दिनुपर्ने अडानमा छन् भने अध्यक्ष प्रचण्ड स्थायी कमिटी र केन्द्रीय कमिटीको बैठकबाट निकास निकाल्नुपर्ने अडानमा छन् ।
गत असार १० गतेदेखि जारी पार्टीकाे स्थायी कमिटी बैठकमा अधिकांश सद्सयले ओलीले दुवै पद छाेड्नुपर्ने दबाब दिएपछि पार्टीकाे आन्तरिक विवाद चरम उत्कर्षमा पुगेकाे छ । विवाद बढ्दै गएपछि बैठकसमेत पटकपटक स्थगित हुँदै आएकाे छ ।
अध्यक्ष ओलीले भने आफू कुनै पनि हालतमा राजीनामा नदिने अडानमा छन् । तर अध्यक्ष प्रचण्ड र वरिष्ठ नेता माधवकुमार नेपाललगायतका नेताहरुले राजीनामा दिनुपर्ने भन्दै आएका छन् ।
प्रकाशित मिति: सोमबार, साउन १९, २०७७ ११:२३
