काठमाडाैं । प्रधानमन्त्रीकाे सचिवालयले स्विस बैंकमा प्रधानमन्त्री केपी शर्मा ओलीले ५५ लाख डलर जम्मा गरेको समाचारकाे खण्डन गरेकाे छ ।
प्रधामन्त्री ओलीका प्रेस सल्लाहकार सूर्य थापाले फेसबुक पेजमा प्रेस नोट लेख्दै 'ग्लोबल वाच एनालाइसिस'को हवाला दिँदै केही नेपाली अनलाइनहरूले छापेको समाचारमा कुनै सत्यता नरहेको बताएका हुन् ।
समाचार कपाेकल्पित र गलत रहेकाे उनले प्रेस नाेटमार्फत जानकारी दिएका छन् । 'स्विस बैंकमा खाता र ५.५ मिलियन अमेरिकी डलर जम्मा रहेकाे वा यस्तै व्यहाेराका तथाकथित रिपोर्ट शतप्रतिशत गलत र कपाेलकल्पित रहेकाे स्पष्ट गर्छु', नाेटमा भनिएकाे छ ।
उक्त पोस्टमा भनिएको छ, 'जुनसुकै दुर्नियतका साथ तयार गरी सम्प्रेषित यस्ता तथ्यहीन सामग्रीहरूलाई आधार मानेर समाचार बनाई नेपाली जनतामा भ्रम छर्न र प्रधानमन्त्रीज्यूलाई बदनाम गर्न उद्यत यस्ता कतिपय सञ्चारमाध्यमहरूको रवैया खेदजनक छ ।'
'राष्ट्रिय हितको रक्षा, सीमा अतिक्रमणविरूद्द नयाँ नक्सा प्रकाशनको साहसिक कदम र सर्वसम्मतिद्वारा संविधान संशोधनजस्तो महत्वपूर्ण निर्णयमा सिंगो राष्ट्रलाई एकताबद्ध गर्दै प्रधानमन्त्रीज्यूले राष्ट्रको नेतृत्व सम्हालिरहनु भएको निकै संवेदनशील बेलामा बदनाम गराउन यस किसिमले सुनियोजित षडयन्त्र गर्ने अनेकन् तत्वहरू सक्रिय रहेको प्रष्ट नै छ', थापाको नाेटमा उल्लेख छ ।
प्रकाशित मिति: बुधबार, असार ३१, २०७७ ०४:४२
