काठमाडौं । रुकुम सोती घटना छानविन संसदीय विशेष समितिले घटनाको प्रतिवेदन सभामुखलाई बुझाएको छ ।
गत जेठ १० गते रुकुम पश्चिमको चौरजहारी, सोती घटनाका सन्दर्भमा अध्ययन गर्न गठित समितिले आज सभामुख अग्निप्रसाद सापकोटालाई प्रतिवेदन बुझाएको हो ।
प्रतिवेदन बुझ्दै सभामुख सापकोटाले प्रतिवेदन अध्ययन गरी छिट्टै कार्यान्वयनमा लैजाने प्रतिबद्धता व्यक्त गरे।
दूरगामी महत्त्वको घटना भएकाले छिट्टै अध्ययन गरी कार्यान्वयनमा लैजाने कुराको हेक्का आफूले राखेको उनले बताए । प्रतिनिधिसभाबाट जेठ २६ गते समिति गठन भएको थियो ।
समितिले हत्याकाण्डका बेला पर्याप्त सावधानी र सुरक्षा नअपनाइएको, पोस्टमार्टममा पनि लापरबाही भएको, अनुसन्धान परम्परागत शैलीमा भएको र पीडितको पनि त्यसप्रति गुनासो रहेको लगायत निस्कर्ष निकालेको छ।
समितिले जातीय छुवाछुत अन्त्यका लागि अझै पर्याप्त कानुन निर्माण गर्नुपर्ने, पीडितका परिवारलाई राहत दिनुपर्ने, पीडितका बालबच्चाको शिक्षा, स्वास्थ्य रोजगारीको लागि राज्यले सिफारिस गर्नुपर्ने, उनीहरुको स्मृतिमा पार्क निर्माण गर्नुपर्ने लगायत सिफारिस गरेको छ ।
अन्तरजातीय विवाहसँग जोडिएको उक्त घटनामा जेठ १० गते जाजरकोटका नवराज विकसहित छजना मारिएका थिए ।
नवराजको सोतीकी एक किशोरीसित प्रेमसम्बन्ध भएको र आफ्नी प्रेमिकालाई लिन भनी गएका नवराजसहित १९ युवामध्ये छजनालाई मारेर भेरी नदीमा फालिएको दाबी केटापक्षको थियो ।
घटनामा संलग्न भएको आरोपमा सोतीका वडाध्यक्षसहित ३४ जनाभन्दा बढी स्थानीयलाई प्रतिवादी बनाइ कर्तव्य ज्यान मुद्दा चलाइएको छ ।
प्रकाशित मिति: मंगलबार, असार ३०, २०७७ १२:५२