काठमाडौं । प्रधानमन्त्री केपी शर्मा ओलीले भगवान् राम भारतीय हाेइन नेपाली हाे भनी दिएकाे अभिव्यक्तिको नेपालमै चर्को आलोचना भएको छ ।
भारतले नक्कली अयोध्या खडा गरेको र भगवान् राम भारतीय पनि नभएको अभिब्यक्ति दिएपछि सामाजिक सञ्जालमा ओलीको आलोचना साथै व्यङ्ग्य समेत भइरहेको छ ।
त्रेतायुगका राम नेपालकै पर्सा जिल्लाको अयोध्यापुरीमा जन्मिएको अभिव्यक्ति दिएपछि पौराणिक विषयमा यस्तो बोल्नु ‘बेतुक’ र ‘पदीय मर्यादा विपरित’ भनेर आलोचना भइरहेको छ ।
यसैगरी भारतीय टेलिभिजन च्यानलले त सामान्य जानकारीसमेत नभएको भन्दै प्रधानमन्त्रीको आलोचना गरेका छन् ।
नेपालका पूर्वप्रधानमन्त्री तथा जनता समाजवादी पार्टीका नेता डा. बाबुराम भट्टराईले ओलीलाई अब छाडा छोड्नु खतरनाक हुने बताएका छन् ।
उनले सामाजिक सञ्जाल ट्विटरमा लेखेका छन्– 'आधी–कवि ओलीकृत कलीयुगीन नयाँ रामायण श्रवण गरौं । सिधै बैकुण्ठधामको यात्रा गरौं !'
'अति गरे खति हुन्छ भन्छन् ! प्रधानमन्त्री केपी शर्मा ओलीका वचन–कर्मले सीमा नाघ्दैछन् । संसद्मा सिंहमेव जयते र बेसार पुराणदेखि अयोध्या पुराणसम्म आउँदा वहाँको चिन्तनप्रणाली स्वस्थ देखिन्न', उनले अगाडि भनेका छन्, 'संसद स्थगत गरेर अध्यादेश–संकटकालको खड्गसमेत वहाँको हातमा छ ! अब वहाँलाई छाडा छोड्नु खतरनाक हुने छ ।'
ओलीकै पूर्व प्रेस सल्लाहकार कुन्दन अर्याल आश्चर्य ब्यक्त गर्दै ‘यो के बोलेको ? कि भारतीय टेलिभिजन च्यानलहरुसँग प्रतिस्पर्धा गरेको ?’ भनेर प्रश्न गरेका छन् ।
पत्रकार गजेन्द्र बुढाथोकीले ट्विटरमा ‘आइएम विथ ओलीबा युनिभरसिटी’ ह्यासट्याग प्रयोग गर्दै लेखेका छन्,–तपाईंको गामठाउँ क्षेत्रमा भएका ‘रामपुर’उल्लेख गर्नुस्, रामको जन्म त्यहीँ हुनसक्ने सम्भावना पनि छ । उदयपुरमा–रामपुर ठोक्सिला ।’
पत्रकार अमित ढकालले ट्विट गर्दै लेखेका छन्, 'श्रीलंका टापु कोसीमा छँदै छ । छेवैमा हनुमान नगर पनि छ, वानर सेनाले पुल हाल्दा बसालेको !’
कांग्रेस नेता अर्जुन नरसिंह केसीले ट्विटरमा लेखेका छन्, 'सर्व शास्त्र पारंगत प्रकाण्ड संस्कृत,वैधिक र प्राग भूइतिहासका ज्ञाता हाम्रा प्रमबाट भारतले नक्कली अयोध्या खडा गरेको शब्दब्रह्म प्रहार भयो ।’अति रूपेण वै सीता चातिगर्वेण रावणःअतिदानाद् बलिर्बद्धो ह्यति सर्वत्र वर्जयेत्भ नेझै यस्ता गम्भीर विषयलाई उखान,टुक्का, हसि र मजाक नबनाऔं।
घटना के हाे ?
भानु जयन्तीका अवसरमा साेमबार प्रधानमन्त्री निवासमा भएको कार्यक्रममा केपी ओलीले भारतले ‘नक्कली अयोध्या’ खडा गरेर साँस्कृतिक तथ्यमाथि अतिक्रमण गरेको बताएका थिए । भगवान् रामको राज्य अयोध्या नेपालको वीरगन्ज पश्चिममा पर्ने भए पनि भारतले विवादित अयोध्या खडा गरेको उनले बताएका थिए ।
उनले कार्यक्रममा भने, ‘हामी अहिले पनि ठानिरहेका छौं, हामीले ‘सीता’ भारतका राजकुमार रामलाई दियौं । भारतका होइन, अयोध्या रामलाई दिएका हौं हामीले । अयोध्या भनेको वीरगन्जभन्दा पश्चिमपट्टिको गाउँ हो ।’
प्रधानमन्त्री ओलीले भारतले भनेको अयोध्या नै सही भए त्यहाँका राजा जनकपुर विवाह गर्न कसरी आइपुगे भनेर प्रश्न समेत गरेका थिए । त्यो समयमा कुनै सञ्चार सुविधाबिना अहिले भारतले बनाएको अयोध्याबाट राम आउन सम्भव नभएको उनको टिप्पणी थियो ।
उनले भनेका थिए, ‘यहाँ जनकपुर उहाँ अयोध्या हुन्थ्यो भने कहाँ छोरीको बिहे गर्न खोज्या छ, त्यसबेलामा न टेलिफोन न मोबाइल कताबाट थाहा होस् । थाहा हुन सम्भव थिएन । नजिकै खोजिन्थ्यो र बिहे भइहाल्थ्यो ।’
प्रकाशित मिति: मंगलबार, असार ३०, २०७७ ०४:५७
