काठमाडौं । बाढी पहिरो पीडितहरुलाई तत्काल उद्धार गरी सार्वजनिक भवन र विद्यालयहरुमा राख्न सकिने विषयमा छलफल भएको छ ।
राष्ट्रिय विपद जोखिम न्यूनीकरण तथा व्यवस्थापन प्राधिकरणले सरोकारवालासँग गरेको छलफलमा तत्काल उद्धार गरी सामुदायिक विद्यालयमा राख्न सकिने विषयमा छलफल गरेको हो ।
प्रधानमन्त्री निवास बालुवाटारमा शनिबार बसेको प्राधिकरणको बैठकले देशका ८ जिल्ला अहिले बाढीपहिरोबाट प्रभावित भएकाले उद्धारदेखि पुनःस्थापनाका काम गर्ने निर्णय गरेको हो ।
प्रधानमन्त्री केपी शर्मा ओली, प्रमुख प्रतिपक्षी नेपाली कांग्रेसका सभापति शेरबहादुर देउवा, मन्त्रीहरू तथा सुरक्षा निकायबीचको बैठकले उक्त निर्णय गरेको हो ।
गृहमन्त्रालय अन्तर्गतको राष्ट्रिय आपतकालीन कार्य सञ्चालन केन्द्रको तथ्यांक अनुसार शुक्रबार बाढी र पहिरोबाट ८ जिल्ला प्रभावित भएका छन् । बाढी र पहिरोमा परी २३ जनाको मृत्यु भएको छ भने ३६ जना बेपत्ता छन् । यस्तै घटनामा परी २६ जना घाइते भएका छन् ।
प्रकाशित मिति: शनिबार, असार २७, २०७७ ०८:२५
