काठमाडौं । सरकारले नेपालका प्रधानमन्त्रीकाे विषयमा जाेडेर अनर्गल प्रचार गर्ने भारतीय सञ्चारमाध्यममाथि राजनीतिक र कानुनी उपचार खोज्ने जनाएको छ ।
नेपाल र प्रधानमन्त्री केपी शर्मा ओलीविरुद्ध भारतीय सञ्चार माध्यमले प्रकाशन प्रशारण गरेका आधारहीन निम्न स्तरका प्रचारप्रति सरकारले आपत्ति जनाउँदै कानुनी उपचार खाेज्ने जनाएकाे हाे ।
भारतीय सञ्चारमाध्यममा आएका समाचारको सरकारले भर्त्सना गर्ने भन्दै सरकारका प्रवक्ता एवं अर्थ र सञ्चार डा. युवराज खतिवडाले यस्ताे बताएका हुन् ।
सञ्चार मन्त्रालयको नियमित पत्रकार सम्मेलनमा पत्रकारहरुसँग उनले भने, ‘सञ्चारमाध्यमहरु, चाहे नेपालका हुन् वा विदेशी, सबैले स्वच्छ, स्वस्थ र पारदर्शी ढंगले समाचार सम्प्रेषण गर्नुपर्छ भन्ने मान्यता हाम्रो छ । दुर्भावना फैलाउने, चरित्र हत्या गर्ने, मानमर्दन गर्ने समाचार तथा विश्लेषणको सरकार भर्त्सना गर्छ । सरकारले मिडियालाई प्रतिबन्ध लगाउनुभन्दा आफू अनुशासनमा बसोस् भन्ने चाहेको छ । कूटनीतिक माध्यमको पनि परिचालन गर्नुपर्ने हुन्छ ।’
उनले अगाडि भने, ‘हाम्रो राष्ट्र, राष्ट्रियता र नेपालीहरुको स्वाभिमानमा आँच पुर्याउने समाचार सम्प्रेषण नगर्न हामी स्वदेशी र विदेशी सबै मिडियालाई आग्रह गर्छौं । यसको पछाडि कानूनी उपचार खोज्नुपर्ने कुराहरु पनि हुन्छन् । राजनीतिक र कानूनी दुबै उपचार खोज्नुपर्ने हुन्छ ।’
यसैगरी प्रधानमन्त्रीका प्रेस सल्लाहकार सूर्य थापाले पनि फेसबुकमा पाेस्ट गर्दै भारतीय मिडियाबारे खेद प्रकट गरेका छन् । थापाले भारतीय मिडियाले पत्रकारिता नगरेर ‘अरु थोक मात्र’ गरिरहेको टिप्पणी गरेका छन् । साथै गलत, भ्रामक र मर्यादाहीन सम्प्रेषण गरेको भन्दै थापाले भारतीय मिडियाको विरोध जनाएका छन् ।
उनले लेखेका छन्, ‘कतिपय भारतीय संचार माध्यमहरुले केही दिनयता गरिरहेको गलत, भ्रामक र मर्यादानि सम्प्रेषणको अभिष्ट राम्रैसँग बुझ्न सकिन्छ । तिनले पत्रकारिता वाहेक अरुथोक मात्र गरिरहेका छन् । तीन करोड नेपालीजनमा यस्ता आधारहीन सम्प्रेषणले कुनै अर्थ राख्दैनन् । बरु जिम्मेवार पत्रकारिताका निम्ति यस्तो सम्प्रेषण स्वयंमा लज्जाको विषय भएको छ ।’
प्रकाशित मिति: बिहीबार, असार २५, २०७७ १२:५९
