काठमाडौं । पूर्वमन्त्री एवं सांसद प्रभु साहले बाढी र पहिरोको खतराबाट जोगिन सबैलाई सचेत गराएका छन् ।
नेकपा प्रदेश नम्बर २ का अध्यक्ष समेत रहेका सांसद साहले देशका विभिन्न जिल्लाहरुमा गएको बाढी पहिरोबाट भएको क्षतिबारे दुःख व्यक्त गर्दै सावधानी अपनाउन आम नागरिक र सरकारलाई अनुरोध गरेका छन् ।
उनले सिन्धुपाल्चोक, गुल्मी, बझाङलगायत देशका बिभिन्न जिल्लामा बाढी तथा पहिरोका कारण ठूलो मानवीय र धनमालको क्षति हुनुका साथै कतिपय स्थान डुबानमा परेको घटनाले दुखित तुल्याएको बताएका छन् ।
बेपत्ता र घरबारविहीन भई विचल्लीमा परेकाहरुका लागि तत्काल उद्धार तथा राहत कार्यमा जुट्न सम्बन्धित पक्षहरुको ध्यानाकर्षण गराउँदै सुरक्षा निकायसहित विपद व्यवस्थापनमा खटिने निकायलाई तयार रहन आग्रह गरेका छन् ।
आगामी केही दिन अविरल वर्षा हुने बाढी पहिरो आउने सम्भावना उच्च रहेकाले आ-आफ्नो पूर्व तयारी गर्न आम नागरिकलाई अनुरोध समेत गरेका छन् ।
सामाजिक सञ्जालमार्फत सांसद साहले भनेका छन्, 'नेपालमा हिजो रातिदेखी मनसुन वर्षा थप सक्रिय भइसकेकाले सिन्धुपाल्चोक लगायत देशका विभिन्न जिल्लामा बाढी, पहिरो तथा डुबानका कारण ठूलो मानवीय र धनमालको क्षति भएको घटनाप्रति गहिरो दुःख, मृतकहरुप्रति भावपूर्ण श्रद्धाञ्जली तथा यस प्राकृतिक प्रकोपबाट प्रभावित परिवारजनमा हार्दिक संवेदना व्यक्त गर्दै वेपत्ता र घरबारविहीन भई विचल्लीमा परेकाहरुका लागि तत्काल उद्धार तथा राहत कार्यमा जुट्न सम्बन्धित पक्षहरुको गम्भीर ध्यानाकर्षण गराउन चाहन्छु ।'
'यसका साथै अबको ३-४ दिनसम्म देशभर अझ भारी वर्षा हुने भएकfले मुख्यतः पहाडमा पहिरो तथा तराई-मधेसमा बाढी र डुबानको थप समस्या आउन सक्ने पूर्वानुमान मौसमविदहरुले गरेका छन्', उनले भनेका छन्, 'यस जोखिमयुक्त विपतको समयमा तपाई सम्पूर्णलाई विशेष सतर्क रही आ-आफ्नो स्थान र स्तरबाट सहयोगी बन्न तथा तिनै तहका सरकार र मुख्यतः सुरक्षा एवं स्वास्थ्य क्षेत्रमा संलग्न(नेपाली सेना, सशस्त्र प्रहरी, नेपाल प्रहरी, रेडक्रॉस.. आदि।) व्यक्ति/संस्थाहरुलाई उद्धार तथा सहायताका लागी हरदम तत्पर-तयारी अवस्थामा रहन आग्रह समेत गर्दछु ।'
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बिहीवारदेखि ४ दिनसम्म पानी पर्ने अनुमान छ ।
प्रकाशित मिति: बिहीबार, असार २५, २०७७ ११:५३
