काठमाडौँ । समाजवादी पार्टीकी सांसद सरिता गिरीलाई पार्टीले साधारण सदस्यता समेत नरहने गरी निस्काशन गरेकाे छ ।
संविधान संशाेधन विधेयकमा पार्टीकाे ह्वीप उल्लंघन गरेको आरोपमा गिरीलाई कार्यदलले कारबाहीका लागि सिफारिस गरे बमोजिम पार्टीको पदाधिकारी बैठकले संसद गिरीलाई पार्टीबाट हटाउने निर्णय गरेको हो ।
पार्टीले साधारण सदस्य समेत नरहने गरी हटाएपछि अब गिरीको सांसद पद पनि जाने भएको छ । समाजवादी पार्टीले गरेको निर्णय संसदलाई जानकारी गराउने समाजवादी पार्टीका नेता विश्वदीप पाण्डेले जानकारी दिएका छन् ।
लिम्पियाधुरा, कालापानी र लिपुलेक क्षेत्र समेटिएको नयाँ नक्साअनुसार निशान छाप परिवर्तन गर्न सरकारले ल्याएको संविधान संशोधन विधेयकमा गिरीले संशोधन प्रस्ताव दर्ता गराएकी थिइन् ।
पार्टीले संशोधन फिर्ता लिन र विधेयकको पक्षमा मतदान गर्न निर्देशन दिए पनि उनले अटेर गरेकी थिइन् ।
प्रकाशित मिति: मंगलबार, असार २३, २०७७ ११:१२
