काठमाडौं । पार्टी एकता धरापमा परेकाे सत्तारुढ दल नेकपाको विवाद समाधानका लागि २ अध्यक्ष केपी शर्मा ओली र पुष्पकमल दाहाल प्रचण्डबीच आज पनि छलफल सुरु भएकाे छ ।
प्रधानमन्त्री निवास बालुवाटारमा भएको भेटमा नेकपाभित्र जारी विवाद समाधानका लागि प्रयास भइरहेको बताइएकाे छ ।
यसअघि सोमबार भएको भेटमा गतिरोध अन्त्यका लागि २ अध्यक्षमात्रै बसेर छलफल गर्ने सहमति भएको थियो ।
साेही अनुरुप पहिले एक्लाएक्लै र त्यसपछि आवश्यकता अनुसार अन्य नेतालाई पनि सहभागी गराउने तयारी रहेको बुझिएकाे छ ।
यसअघि आइतबार पनि ओली र प्रचण्डबीच छलफल भएको थियो । साे दिनकाे छलफलमा अध्यक्षद्वयसँगै साक्षीका रूपमा महासचिव बिष्णु पौडेल, शंकर पाेखरेल, पूर्वमन्त्री जनार्दन शर्मा र वर्षमान पुन सहभागी थिए ।
पार्टीकाे आन्तरिक विवादका कारण स्थायी कमिटी बैठक पनि पटकपटक स्थगित हुँदै आएकाे छ । अर्को बैठक भोलिका लागि बोलाइएको छ । त्यसअघि विवाद समाधानकाे पहलमा अध्यक्षद्वय निरन्तर बैठक बसिरहेका छन् ।
प्रकाशित मिति: मंगलबार, असार २३, २०७७ ०५:५८
