काठमाडौं । साेमबारका लागि तय भएकाे नेपाल कम्युनिस्ट पार्टी (नेकपा) को स्थायी कमिटी बैठक पुनः स्थगित भएको छ ।
नेकपाको आन्तरिक विवादका कारण स्थायी कमिटी बैठक पटकपटक स्थगित हुँदै आएको छ ।
नेकपाका अनुसार स्थायी कमिटीको अर्को बैठक असार २४ गते बस्ने छ । पार्टीभित्र बढ्दै गएको विवाद समाधानका लागि शीर्ष नेताहरुबीच गम्भीर छलफल गर्नुपर्ने भएकाले बैठक स्थगित भएको नेकपाले जनाएको छ ।
यसअघि शनिबार बस्ने भनिएको बैठक आजसम्मका लागि स्थगित गरिएको थियो । त्यसअघि बिहीबार बसेको बैठक सहमति खोज्नकै लागि भनेर शनिबार बस्ने गरी स्थगित गरिएको थियो ।
बैठक स्थगित गरेर नेकपाका अध्यक्षद्वय केपी शर्मा ओली र पुष्पकमल दाहाल ‘प्रचण्ड’ बालुवाटारमा वान् टु वान् वार्तामा बसेका छन् ।
दुई अध्यक्षबीचको वार्ता बिहान ९ बजेपछि सुरु भएको पार्टी अध्यक्ष प्रचण्डका प्रेस संयोजक विष्णु सापकोटाले जानकारी दिए ।
यसअघि आन्तरिक विवाद मिलाउन आइतबार ओली र अर्का अध्यक्ष ‘प्रचण्ड’ बीच प्रधानमन्त्री निवास बालुवाटारमा छलफल हुँदा दोस्रो तहका ४ नेतालाई सहमतिको खाका बनाउन जिम्मेवारी दिइएको थियो ।
कार्यदलले परामर्श र खाका निर्माणको काम गरिरहेको छ । कार्यदलमा महासचिव विष्णुप्रसाद पौडेल तथा स्थायी कमिटी सदस्य शङ्कर पोखरेल, जनार्दन शर्मा र वर्षमान पुन छन् ।
यसैबीच, सहमतिका लागि प्रस्तावित भनी बाहिर आएको ५ बुँदे खाकाका बारेमा अध्यक्ष दाहालको सचिवालयले खण्डन गरी पार्टी एकता नभड्काउन आग्रह गरेको छ ।
नेकपा स्थायी कमिटी बैठकमा अधिकांश सदस्यहरुले प्रधानमन्त्री ओलीको राजीनामा मागेपछि नेकपा फुटको संघारमा पुगेको छ । पार्टी एकता बलियाे बनाउन नेताहरू चरण चरणमा वार्तामा बसेपनि ठाेस निष्कर्ष निकाल्न सकेकाे छैन ।
प्रकाशित मिति: सोमबार, असार २२, २०७७ ०६:०६