काठमाडाैं । राष्ट्रपति विद्यादेवी भण्डारी र नेकपाका शीर्ष नेताहरूबीचकाे भेट सकिएकाे छ ।
पार्टीमा विवाद बढर फुटकाे संघारमा पुगेपछि पार्टी अध्यक्ष प्रचण्ड तथा नेताहरू माधव नेपाल र झलनाथ खनाल राष्ट्रपतिलाई भेट्न शीतल निवास पुगेका थिए ।
भेटमा नेताहरूले राष्ट्रपतिविरुद्ध महाअभियोग लगाउने हल्ला निराधार रहेको भन्दै त्यस्तो अफवाहको विश्वास नगर्न राष्ट्रपति विद्यादेवी भण्डारीसँग आग्रह गरेका थिए ।
'तपाईंविरूद्ध महाभियोगको तयारी हुँदैछ भनेर हल्ला चलाइएछ । हामीले एकै श्वरमा भन्यौं । त्यस्तो हल्ला निराधार हो । कुनै तयारी छैन । कल्पना पनि गरेको छैन । पार्टीभित्रको समस्या आन्तरिक हो । यो हामी मिलाउँछौं । यसमा राष्ट्रपति कार्यालय मुछिनु आवश्यक छैन । ढुक्क रहनुस् भनेर भन्यौं', भेटमा भनेकाे कुरा नेकपाका नेता खनालले सुनाए ।
जवाफमा राष्ट्रपति भण्डारीले आफूले पनि त्यसो होला भनेर कल्पना नगरेको बताउँदै नेताहरूलाई पार्टी एकता नतोड्ने गरी सहमतिको बाटो खोज्न आग्रह गरिन् ।
बालुवाटारमा ओली-प्रचण्ड निर्णायक वार्ता सुरु
यसैबीच, नेकपाका २ अध्यक्ष ओली र प्रचण्डबीच पार्टी विवाद समाधानका लागि निर्णायक वार्ता सुरु भएको छ । राष्ट्रपति विद्यादेवी भण्डारीलाई भेटेर अध्यक्ष प्रचण्ड प्रधानमन्त्री निवास बालुवाटार पुगेका हुन् ।
बालुवाटार स्रोतका अनुसार उनीहरुसँगै दुवै पक्षबाट अरु ४ जना दोस्रो तहका नेता पनि छलफलमा सहभागी छन् । साक्षीका रुपमा ओलीका तर्फबाट महासचिव विष्णु पौडेल र शंकर पोखरेल तथा प्रचण्ड पक्षबाट जनार्दन शर्मा र वर्षमान पुन सहभागी रहेकाे बालुवाटार स्राेतले जानकारी दिएकाे छ ।
सत्तारुढ नेकपाभित्र ओली पक्ष र अर्का अध्यक्ष प्रचण्डसहित नेपाल र खनाल पक्षबीच तीव्र विवाद देखिएको छ ।
शनिबारका लागि तय गरिएकाे पार्टीकाे स्थायी कमिटी बैठक पनि गम्भीर छलफल गर्नुपर्ने भएकाे भन्दै साेमबारसम्मका लागि स्थगित गरिएकाे छ ।
प्रधानमन्त्री ओलीमाथि स्थायी समिति बैठकमा राजीनामा दिन दबाब बढेपछि नेकपाभित्र विवाद चुलिएको छ। ओलीले भने हालतमा दुवै पद नछाड्ने अडान लिएका छन् ।
प्रकाशित मिति: आइतबार, असार २१, २०७७ ०६:३८