काठमाडाैं । सत्तारूढ नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ र वरिष्ठ नेताहरू झलनाथ खनाल र माधवकुमार नेपाल राष्ट्रपति विद्यादेवी भण्डारीलाई भेट्न शीतल निवासमा पुगेका छन् ।
नेकपामा तीव्र विवाद बढेर फुटकाे संघारमा पुगेका बेला नेताहरूकाे दाैडधूप बढेकाे छ । पछिल्लो समय नेकपाको विवादमा राष्ट्रपति पनि मुछिएपछि उनीसँगकाे भेटलाई पनि नेताहरूले तीव्रता दिएका छन् ।
शनिबार साँझ प्रधानमन्त्री एवं नेकपा अध्यक्ष केपी शर्मा ओलीले मन्त्री र राज्यमन्त्रीलाई भेला गरेर राष्ट्रपतिलाई महाअभियोग र आफूलाई अध्यक्ष र प्रधानमन्त्री दुवै पदबाट हटाउने षड्यन्त्र भएको भन्दै आफ्नाे कित्ता क्लियर गर्न निर्देशन दिएका थिए ।
यसैबीच, प्रधानमन्त्री केपी शर्मा ओली र पार्टी अध्यक्ष पुष्पकमल दाहालबीच पनि भेटवार्ता हुने भएकाे छ । प्रधानमन्त्री निवास बालुवाटारमा बिहान ११:३० बजे भेटवार्ताका लागि समय तय भएको प्रधानमन्त्रीका प्रेस सल्लाहकार सूर्य थापाले जानकारी दिए ।
स्थायी कमिटी बैठक रोकिएपछि २ अध्यक्षबीच शनिबार साँझ नै भेटघाटका लागि समय निर्धारण गरिएपनि त्याे सम्भव भएकाे थिएन ।
शनिबारका लागि तय गरिएकाे पार्टीकाे स्थायी कमिटी बैठक पनि गम्भीर छलफल गर्नुपर्ने भएकाे भन्दै साेमबारसम्मका लागि स्थगित गरिएकाे छ ।
प्रधानमन्त्री ओलीमाथि स्थायी समिति बैठकमा राजीनामा दिन दबाब बढेपछि नेकपाभित्र विवाद चुलिएको छ। ओलीले भने हालतमा दुवै पद नछाड्ने अडान लिएका छन् ।
प्रकाशित मिति: आइतबार, असार २१, २०७७ ०५:३३