काठमाडौं । प्रधानमन्त्री केपी शर्मा ओलीले पार्टी एकता जटिल मोडमा पुगेको भन्दै जेसुकै निर्णय हुनसक्ने चेतावनी दिएका छन् ।
सत्तारुढ नेपाल कम्युनिस्ट पार्टी (नेकपा) भित्रको सत्तासंघर्ष चरमोत्कर्षमा पुगेका बेला मन्त्रिपरिषद्का सदस्यहरुलाई शनिबार साँझ बालुवाटारमा बोलाएर उनले स्थित जता पनि जान सक्ने भएकाले आफ्नाे 'कित्ता क्लियर' गर्न निर्देशन दिएका हुन् ।
प्रधानमन्त्री ओलीले मन्त्रीहरुलाई आफू र राष्ट्रपतिविरुद्ध षड्यन्त्र गरेर हटाउन खाेजेकाे भन्दै सो षड्यन्त्रलाई बाइफोर्स नियन्त्रण गर्नुपर्ने बताएका छन् ।
प्रधानमन्त्री ओलीले त्यस्तो अवस्था आएमा आफू कुन पक्षमा जाने हाे त्यसकाे निर्णय गर्न मन्त्रीहरूलाई भनेका हुन् ।
प्रधानमन्त्री ओलीले स्थायी कमिटीको बैठकको निर्णय आफूले नमान्ने बताएकाे बैठकमा सहभागी एक मन्त्रीले जानकारी दिए ।
यसैगरी प्रधानमन्त्री ओलीले मन्त्रीहरूसँग अध्यक्ष र प्रधानमन्त्री दुबै पद नछोड्ने आफ्नाे अडान रहेकाे बताएका थिए ।
‘म बाइस्टेप, बाइफोर्स कदम चाल्दै छु, तपाईंहरु कता लाग्ने हो निर्धारण गर्नुस्,’ ती मन्त्रीले भने, ‘हुल्लडहरुको समूह स्थायी कमिटीले गरेको निर्णय म मान्दिनँ । स्थिति एकदम जटिल छ, हरेकले निर्णय गर्नुपर्ने बेला आएको छ ।’
राष्ट्रपति विद्यादेवी भण्डारीविरुद्ध अर्का अध्यक्ष प्रचण्ड र नेता माधवकुमार नेपालले महाभियोग लगाउने तयारी गरेकाे सूचना आफूले पाएकाे छलफलमा ओलीले बताएका थिए ।
प्रधानमन्त्री ओलीले सबै मन्त्री र राज्यमन्त्रीसँगको छलफल सकिएपछि आफू निकटका मन्त्रीसँग पनि छुट्टै छलफल गरेका छन् ।
यसअघि प्रधानमन्त्री ओलीले शनिबार साँझ नै शीतल निवासमा राष्ट्रपति परामर्श गरेका थिए ।
नेकपाको जारी स्थायी कमिटी बैठकमा अधिकांश सदस्यले ओलीको कार्यशैलीका कारण सरकार र पार्टी दुवै संकटमा परेको भन्दै दुबै पदबाट राजीनामा दिन दबाब दिएका छन् ।
प्रकाशित मिति: शनिबार, असार २०, २०७७ १६:००
