काठमाडौं । प्रमुख सत्तारुढ दल नेपाल कम्युनिस्ट पार्टी (नेकपा) का अध्यक्षद्वय केपी शर्मा ओली र पुष्पकमल दाहाल 'प्रचण्ड'बीच निर्णायक वार्ता सुरु भएको छ ।
पार्टीभित्र विवाद चुलिँदै गएपछि पार्टी अध्यक्ष तथा प्रधानमन्त्री ओलीलाई भेट्न अर्का अध्यक्ष प्रचण्ड बालुवाटार गएका हुन् । शुक्रबार मध्यान्ह १२ बजे २ अध्यक्षबीच वार्ता सुरु भएको बालुवाटार स्रोतले जानकारी दियो ।
पार्टीमा अन्तरिक कलह बढ्दै गएपछि शीर्ष नेताहरुबीचकाे भेटघाट बाक्लिएकाे छ । बिहीबार पनि नेकपाका शीर्ष नेताहरुबीच छलफल भएकाे थियाे ।
पार्टीभित्र विवाद उत्कर्षमा पुगेपछि सहमति खोज्नका लागि स्थायी कमिटी बैठक शनिबारसम्मका लागि स्थगित भएकाे छ ।
दाेस्राे तहका नेताले दिए मिलेर जान दबाब
यसैबीच पार्टीका शीर्ष नेताहरुबीचमा विवाद देखिएपछि दोस्रो तहका नेताहरुले पनि छलफल थालेका छन् ।
पार्टीका दोस्रो पुस्ताका स्थायी समिति सदस्यहरूको भेलाले पार्टी एकता हुँदाको म्यान्डेटका आधारमा अगाडि बढ्न नेतृत्वलाई सुझाव दिएकाे छ ।
स्थायी समिति सदस्य एवम् कृषि मन्त्री घनश्याम भुसालको निवासमा भएको स्थायी समिति सदस्यहरूको छलफलले पार्टी एकताको आधारबाट पछि हट्न नहुने सुझाव दिएको हो । उनीहरुले शिर्ष नेताहरुलाई मिलेर जान दबाब समेत दिएका छन् ।
छलफलमा शंकर पोखरेल, जनार्दन शर्मा, प्रदीप ज्ञवाली, योगेश भट्टराई, शक्ति बस्नेत, वर्षमान पुन, बिष्णु रिमाल, सुरेन्द्र पाण्डे, टोपबहादुर रायमाझी, मणि थापा लगायतका नेताहरुको उपस्थिति थियो ।
पछिल्लो समय नेकपाभित्र प्रधानमन्त्री ओलीलाई प्रधानमन्त्री र पार्टी अध्यक्ष दुवै पदबाट राजीनामा दिन दबाब छ ।
प्रकाशित मिति: शुक्रबार, असार १९, २०७७ ०६:३८