काठमाडौ । सत्तारुढ दल नेपाल कम्युनिस्ट पार्टी (नेकपा) काे आन्तरिक विवाद थप चुलिएकाे छ ।
प्रधानमन्त्री केपी शर्मा ओलीलाई पदबाट हट्न दबाब परिरहेका बेला ओलीइतरका नेताहरूकाे छुट्टै बैठक बसेकाे छ । ललितपुरको झम्सिखेलस्थित अगेनो बेकरीमा नेकपा अध्यक्ष पुष्पकमल दाहाल र वरिष्ठ नेता माधवकुमार नेपाल समूहका नेताहरू भेला भएका हुन् ।
बुधबार ५ जनाले बोलेर बैठक स्थगित भएपछि आन्तरिक छलफल गरेका दाहाल–नेपाल समूहकाे छुट्टै बैठक बसेकाे हाे ।
भेलामा दाहाल–नेपाल समूहका स्थायी कमिटी सदस्य तथा केही मन्त्रीहरू पनि सहभागी भएको बुझिएकाे छ । स्राेतका अनुसार भेलामा नेकपा अध्यक्ष दाहाल, वरिष्ठ नेता नेपाल, झलनाथ खनाल, वामदेव गौतम, नारायणकाजी श्रेष्ठ, रामबहादुर थापालगायत सहभागी छन् ।
पछिल्लो समय पार्टीका २ अध्यक्षले आ-आफ्नाे समूहकाे छुट्टै बैठक राख्न थालेका छन् । बुधबार बिहान मात्रै प्रधानमन्त्री केपी शर्मा ओलीले बालुवाटारमा आफू निकटका नेताहरूलाई बाेलाएर छलफल गरेका थिए ।
असार १० गतेदेखि बसेकाे स्थायी कमिटीकाे बैठकमा बाेल्ने अधिकांश सदस्यले ओलीले प्रधानमन्त्री र अध्यक्ष दुवै पदबाट राजीनामा दिनुपर्ने माग गरेका छन् मंगलबारको स्थायी कमिटी बैठकमा प्रचण्डसहितका नेताहरुले ओलीको राजीनामा माग गरेका थिए ।
बुधबार बसेकाे बैठकमा बाेलेका ५ मध्ये ४ जनाले पनि ओलीकाे राजीनामा मागेका थिए ।
प्रकाशित मिति: बुधबार, असार १७, २०७७ १४:३७