काठमाडौं । नेपाल कम्युनिस्ट पार्टी (नेकपा) को स्थायी कमिटी बैठक बिहीबारसम्मका लागि स्थगित गरिएको छ ।
बुधबार करिब १ घण्टा बसेको बैठक बिहीबार बस्ने गरी स्थगित गरिएको हो । कांग्रेस सांसदको निधनमा संघीय संसदको बैठकमा शोक प्रस्ताव पारित गर्ने कार्यक्रम भएकाले बैठक स्थगित गरिएको हो ।
बुधबारको बैठकमा ५ जनाले बोलेका थिए । बैठकमा स्थायी कमिटी सदस्यहरू लीलामणि पोखरेल, योगेश भट्टराई, मातृका यादव, एनके प्रसाईं र पेशल खतिवडाले धारणा राखेका थिए ।
बैठकमा बाेल्दै स्थायी कमिटी सदस्य लीलामणि पोखरेल र मातृका यादवले खुलेरै ओलीको राजीनामा माग गरेका थिए भने नन्दकुमार प्रसाइँ र पेशल खतिवडाले भने सरकारको आलोचना गर्दै घुमाउरो पारामा राजीनामा मागेका थिए ।
बैठकमा मदन जयन्तीका अवसरमा असार १४ गते प्रधानमन्त्रीले राखेका विचार, सरकार हटाउन भारत सक्रिय रहेको, त्यसमा पार्टीका नेताहरूको संलग्नता रहेको भन्ने प्रधानमन्त्रीकाे भनाई र २ दिनअघि निर्वाचन आयोगमा दर्ताको लागि आवेदन परेको भनिएको नेकपा (एमाले) को सम्बन्धमा छलफलमा सदस्यहरूले भाग लिएका थिए ।्
बैठक बिहीबार बिहान ११ बजे पुनः बस्ने छ ।
प्रकाशित मिति: बुधबार, असार १७, २०७७ ०७:५३