काठमाडौं । राष्ट्रपति विद्यादेवी भण्डारीले राष्ट्रिय एकताका साथ नयाँ नक्सा पारित गरेकामा दलका नेताहरुलाई धन्यवाद दिएकी छिन् ।
संसदमा प्रतिनिधित्व गर्ने दलका नेताहरुलाई बुधबार साँझ शितल निवासमा बाेलाएर राष्ट्रपति भण्डारीले नयाँ नक्सा पारित गर्दा अभूतपूर्व एकताका देखाएकामा धन्यवाद व्यक्त गरेकी हुन् ।
भण्डारीले बुधबार साँझ संसदमा प्रतिनिधित्व गर्ने प्रमुख दलका शीर्ष नेताहरु, उपराष्ट्रपति, सभामुख, राष्ट्रियसभा अध्यक्ष, प्रधानमन्त्री, पूर्व प्रधानमन्त्रीहरुलाई शीतल निवासमा सामूहिक भेटघाटका लागि बोलाएकी थिइन् ।
कोरोना महामारी नियन्त्रण तथा रोकथाममा अग्रमोर्चामा खटिएका स्वास्थ्यकर्मी, सुरक्षाकर्मीको समेत उच्च प्रशंसा गरेको राष्ट्रपतिका स्वकीय सचिव डा भेषराज अधिकारीले बताए ।
‘राष्ट्रपतिज्यूले कुनै राजनीतिक उद्देश्यका लागि सबै उच्च पदस्त व्यक्ति ज्यूलाई बोलाउनु भएको होइन,’ अधिकारीले भने, ‘संविधान संशोधनमा सबै दलले देखाएको राष्ट्रिय एकतालाई खुसी व्यक्त गर्दै धन्यवाद दिन बोलाउनु भएको हो ।’
राष्ट्रपतिको निमन्त्रणामा पूर्वप्रधानमन्त्री पुष्पकमल दाहाल प्रचण्ड, झलनाथ खनाल, माधवकुमार नेपाल, बाबुराम भट्टराई, शेरबहादुर देउवा र लोकेन्द्रबहादुर चन्द पुगेका थिए । यस्तै नेकपाबाट सचिवालय सदस्य नारायणकाजी श्रेष्ठ, ईश्वर पोखरेल, विष्णु पौडेल, रामबहादुर थापा लगायत नेता पुगेका थिए ।
कांग्रेसबाट रामचन्द्र पौडेल, शेखर कोइराला, संशांक कोइराला पनि पुगेका थिए। जनता समाजवादी पार्टीबाट महन्थ ठाकुर, उपेन्द्र यादव र राजेन्द्र महतो पुगेका थिए भने राष्ट्रिय जनमार्चाका अध्यक्ष चित्रबहादुर केसी पनि सहभागी थिए।
नेताहरु करिब १ घण्टा राष्ट्रपति कार्यालय शीतल निवासमा बसेर सामान्य चियापान गरेर फर्किएको अधिकारीले बताए ।
प्रकाशित मिति: बुधबार, असार १०, २०७७ १५:१२