काठमाडौं । नेपाल कम्युनिस्ट पार्टी (नेकपा) सचिवालय बैठक शनिबार बिहान बस्दै छ। पार्टी अध्यक्षसमेत रहेका प्रधानमन्त्री केपी ओलीले शनिबार बिहान ९ बजे प्रधानमन्त्री निवास बालुवाटारमा बैठक बोलाएको प्रधानमन्त्रीका प्रेस सल्लाहकार सूर्य थापाले जानकारी दिए ।
बैठक अमेरिकी सहयोग परियोजना (एमसिसी)मा केन्द्रित हुने छ । संसदको यसै अधिवेशनबाट एमसिसी पारित गर्ने कि नगर्ने भनेर नेकपाभित्र तीव्र विवाद छ ।
प्रधानमन्त्रीसमेत रहेका अध्यक्ष ओली संसदबाट एमसीसी पारित गर्ने पक्षमा छन्। अर्का अध्यक्ष पुष्पकमल दाहाल ‘प्रचण्ड’ भने कार्यदलको सुझाव अनुसार अगाडि बढ्नुपर्ने अडानमा छन्। प्रचण्डसहितका नेताले कार्यदलले बनाएको प्रतिवेदनमाथि स्थायी समितिमा छलफल गर्नुपर्ने अडान राख्दै आएका छन्।
एमसीसीको विषयमा चर्को विवाद भएपछि नेकपाले वरिष्ठ नेता झलनाथ खनालको नेतृत्वमा अध्ययन कार्यदल बनाएको थियो। कार्यदलमा परराष्ट्रमन्त्री प्रदिप ज्ञवाली र नेता भीम रावल सदस्य थिए। कार्यदलले तयार पारेको प्रतिवेनमा एमसीसी परिमार्जन गरेर मात्र संसद बाट पारित गर्नुपर्ने सुझाव दिइएको छ।
यसैगरी प्रतिनिधिसभाको राज्य व्यवस्था समितिमा २ वर्षदेखि अल्झिरहेको नागरिकता विधेयकलाई लिएर नेकपा अध्यक्षद्वय सहित केही शीर्ष नेताहरुको बैठक शुक्रबार बसेको थियो । सो विषयमा पनि बैठकमा छलफल हुने बताइएकाे छ ।
प्रकाशित मिति: शनिबार, असार ६, २०७७ ०२:०४