काठमाडौं । सरकारले लकडाउनमा थप कडाइ गरेको छ । गृह मन्त्रालयले लकडाउनलाई व्यवस्थित बनाउनका लागि अत्यावश्यक कामबाहेक राति हिँड्न समेत रोक लगाएको छ ।
शुक्रबार गृह मन्त्रालयले जारी गरेको ‘बन्दाबन्दीलाई व्यवस्थित गर्ने सम्बन्धी सुरक्षा मापदण्ड २०७७’ मार्फत् अत्यावश्यक कामबाहेक राति १० बजेदेखि बिहान ५ बजेसम्म हिँडडुलमा रोक लगाएको हो ।
‘अत्यावश्यक कामबाहेक कुनै पनि व्यक्तिलाई राति १० बजेदेखि बिहान ५ बजेसम्म हिँड्डुल गर्न पूर्णतः निषेध गर्ने’, गृहद्वारा जारी‘ निर्देशिकामा भनिएको छ ।
मन्त्रालयबाट जारी नयाँ मापदण्डमा विवाह व्रतबन्ध, मृत्यु संस्कार, चाडपर्व, पूजा पाठ लगायतका सांस्कृतिक तथा सामाजिक कार्यक्रमहरू गर्नुपर्ने अवस्थामा तोकिएको सामाजिक दूरी कायम गर्नुपर्ने र १५ जनाभन्दा बढी भेला हुन नपाइने उल्लेख गरिएको छ ।
यसैगरी उत्पादनमूलक क्रियाकलाप, उद्योग, भौतिक पूर्वाधार तथा विकास निर्माण लगायतमा १ स्थानमा १ पटकमा १० जनाभन्दा बढी भेला हुन नपाइने पनि भनिएको छ ।
ज्येष्ठ नागरिक, बालबालिका, सुत्केरी, गर्भवती महिला र अशक्त व्यक्तिलाई अत्यावश्यक कामबाहेक घर बाहिर ननिस्किन प्रोत्साहित गर्न पनि गृहले भनेको छ ।
प्रकाशित मिति: शुक्रबार, असार ५, २०७७ १४:२३