काठमाडाैं । राष्ट्रियसभाबाट संविधान संशोधन विधेयक सर्वसम्मत पारित भएको छ ।
बिहिवार राष्ट्रिय सभा बैठकमा दफावार छलफलपछि नेपालको संविधान (दोस्रो संशोधन २०७७) सर्वसम्मत पारित गरिएको हो। कानुन न्याय तथा संसदीय मामिलामन्त्री डा. शिवमाया तुम्बाहाङ्फेको प्रस्तावमा विधयेक निर्णयार्थ पेस भएको हो ।
राष्ट्रियसभाको नियमावली १ सय २९ अन्तर्गत हस्ताक्षरसहित मतविभाजनद्वारा पारित भएको हो । जसको पक्षमा ५७ मत परेको थियो । विपक्षमा कुनै पनि मत परेन । राष्ट्रिय सभाको ५८ सांसदमध्ये एक जना अध्यक्ष छन् ।
यसअघि गत शनिबार प्रतिनिधिसभाकाे बैठकमा ३ तिहाईभन्दा बढी मतले यो विधेयक पारित भएको थियो ।
राष्ट्रिय सभाले विधेयक पारित भएको सूचना अब प्रतिनिधिसभालाई दिने छ । प्रतिनिधिसभाले विधेयक प्रमाणिकरणका लागि राष्ट्रपति समक्ष प्रस्तुत गर्ने छ ।
राष्ट्रपतिले प्रमाणीकरण गरेसँगै नेपालको संविधानमा नयाँ निशान छाप समेटिने छ ।
प्रकाशित मिति: बिहीबार, असार ४, २०७७ ०७:३७