काठमाडौं । आइतबारका लागि बाेलाइएकाे सत्तारुढ नेकपाको केन्द्रीय सचिवालय समितिको बैठक स्थगित गरिएको छ ।
एमसिसीबारे छलफल गर्न प्रधानमन्त्री निवास बालुवाटारमा अपराह्न ४ बजेका लागि बैठक बाेलाइए पनि अन्तिम समयमा स्थगित गरिएको हो । महासचिव विष्णु पौडेलले आकस्मिक काम परेकाले बैठक स्थगित गरिएको जानकारी दिएका छन् ।
आइतबार अध्यक्षद्वय केपी ओली, पुष्पकमल दाहाल र महासचिव पौडेलबीचको परामर्शबाट बैठक स्थगित गरिएको हो । दुवै अध्यक्ष र महासचिवको परामर्शमा बोलाइएको बैठक आकस्मिक काम परेकाले परामर्शबाटै स्थगित गरिएको पौडेलको भनाइ छ ।
बैठकमा एमसिसी अध्ययन कार्यदलका सदस्य भीम रावल, प्रदीप ज्ञवाली र अर्थमन्त्री डा.युवराज खतिवडालाई पनि बोलाइएको थियो । एमसिसीकै बारेमा छलफल गर्न बोलाइएको सचिवालय बैठक २ पटक स्थगित भइसकेको छ ।
प्रकाशित मिति: आइतबार, जेठ ३२, २०७७ १०:४६