काठमाडाैं । प्रतिनिधिसभा बैठकले संविधानको दोस्रो संशोधन विधेयकसर्वसम्मत पारित गरेको छ ।
शनिबारको बैठकमा २ सय ५८ सांसद उपस्थित थिए । उनीहरू सबैले संविधान संशोधनको पक्षमा अर्थात् हुन्छ भन्ने पक्षमा मत दिएका हुन् ।
कानुन न्याय तथा संसदीय मामिलामन्त्री डा. शिवमाया तुम्बाहाङ्फेको प्रस्तावमा विधयेक निर्णयार्थ पेस भएको थियो ।
संशोधनको विपक्षमा एकमत पनि नपर्दै सो प्रस्ताव पारित भएको हो । सबै दलका उपस्थित सांसदहरु संशोधन प्रस्तावको छलफलमा सहभागी भएका थिए । तर सरिता गिरी भने छलफलमा सहभागी भइनन् ।
संविधान संशोधन दोस्रो संशोधन विधेयक २०७७ लाई पारित गरियोस भन्ने प्रस्तावको पक्षमा २५८ मत परेका र उक्त संख्या संसदको तत्काल कायम रहेको संख्याको दुई तिहाइ भन्दा बढी मत भएकाले दुई तिहाइ बहुमतले संविधान संशोधन विधेयक पारित भएको घोषणा सभाखुख साप्कोटाले गरेका हुन् ।
विधेयक पारितपछि अब राष्ट्रिय सभामा पेस हुनेछ। राष्ट्रिय सभामा पनि विधेयक पारितका प्रक्रिया प्रतिनिधि सभामा सरह हुनेछन् । राष्ट्रिय सभाबाट पारित भएर राष्ट्रपतिबाट लागू भएसँगै नेपालको निशान छाप परिवर्तन हुने छ ।
प्रकाशित मिति: शनिबार, जेठ ३१, २०७७ ११:१८
