काठमाडौँ । प्रधानमन्त्री केपी शर्मा ओलीले भारतकाे उत्तर प्रदेशका मुख्यमन्त्रीले बोलेको कुरा सही हो भने त्यो जायज नभएको बताएका छन् ।
बुधबारकाे प्रतिनिधिसभा बैठकमा सांसदले उठाएको प्रश्नको जवाफ दिँदै उनले भने, ‘आदित्यनाथले बोल्नुभएको हो भने जायज होइन, हामीलाई धम्क्याउन खोज्नुभएको हो भने उचित होइन । उहाँ केन्द्रीय सरकारको मुख्य व्यक्ति होइन, नबोलिनुपर्थ्याे, यदि बोलिएको हो भने नेपाल हेपिन तयार छैन, हेपिँदैन भन्ने स्मरण गराउन चाहन्छु ।’
प्रधानमन्त्री ओलीले नेपाल हेपिन तयार छैन भन्दै यसलाई हामीले नेपालमाथिको अपहेलनाको रुपमा लिने भन्दै उनले आदित्यनाथलाई स्मरण गराएका छन् ।
आदित्यनाथले जेठ २१ गते बुधबार लखनउमा इन्डो एसियन न्यूज सर्भिसलाई दिएको अन्तर्वार्ताका क्रममा नेपालले आफ्नो देशको राजनीतिक सीमा निर्धारण गर्नुभन्दा अघि त्यसबाट उत्पन्न हुने परिणामका बारेमा पनि सोच्नुपर्ने बताएका थिए ।
यसैगरी भारतले सेना राखेर नेपालको भूमि कब्जा गरेकाले अहिले तनावको अवस्था आएको ओलीले बताए । उनले भने, ‘भारतले हाम्रो भूमि कब्जा गरेको छ । तथ्य–प्रमाणका आधारमा नेपालको देखाउने भूमि फिर्ता गर्नु पर्छ । समस्याको समाधान भनेको हाम्रो भूति फिर्ता गर्नु नै हो ।’
प्रधानमन्त्री ओलीले भने, ‘नक्कली काली नदी, तिरतिरे खोल्सा, दह बनाएर सो क्षेत्रको भूमि कब्जा भएको छ ।’ सुस्तासहितका क्षेत्रमा पनि विवाद रहेको तर कालापानी क्षेत्रमा जस्तो गम्भीर नरहेको उनले बताए ।
उनले भने, ‘सुस्तामा कालापानीमा जस्तो कब्जा भएको छैन, अहिले हामीले फोकस गरिरहेको कुरा कालापानी, लिम्पियाधुरा हो ।’
प्रकाशित मिति: बुधबार, जेठ २८, २०७७ ०७:४८
