काठमाडाैं । प्रधानमन्त्री केपी शर्मा ओलीले संविधान संशोधन विधेयक माथिको सैद्धान्तिक छलफलका क्रममा देखिएको राष्ट्रिय एकताप्रति आफू गाैरवान्वित भएकाे बताएका छन् ।
प्रतिनिधिसभाको बजेट अधिवेशनमा प्रधानमन्त्री कार्यालय अन्तर्गतको जवाफ दिन उपस्थित भएका प्रधानमन्त्री ओलीले अप्ठ्यारो परेको बेलामा एक हुने र राष्ट्रिय चरित्र देखाउने प्रवृत्ति फेरि एकपटक देखिएको बताए ।
‘विभिन्न चुनौतीको सामना गर्न राष्ट्रियताको सवाल, कोरोना महामारी र यसले उत्पन्न गरेको अप्ठ्यारोहरुको सामना गर्न आज जुन राष्ट्रिय एकता आवश्यकता छ,’ प्रधानमन्त्रीले भने, ‘त्यो हिजोको सभामा देखापरेको छ। यसप्रति म गर्व गर्दछु ।’
उनले नयाँ नक्सा जारी गर्नुलाई कुनै व्यक्तिलाई मात्रै जस दिनु नहुने भन्दै उनले भने, ‘कसले जस लिने, कसको देवत्वकरण गर्ने हुँदै होइन । यसमा हामीले लामो समयदेखि उठाएका छौं, यसमा हामीले कसैले जस पाउला भनेर चिन्ता गर्नुपर्दैन कोही छुट्ला भनेर पनि चिन्ता गर्नुपर्दैन । सबैले सर्बसम्मत गरेपछि सबैको भावना अट्छ ।’
उनले संसदभन्दा बाहिर पनि राष्ट्रिय एकता कायम भएकोमा बौद्धिक वर्ग, संघसंस्थाहरु लगायतलाई आभार प्रकट गरे ।
‘हाम्रो पुर्खाले यो देशलाई लडेर बनाएर बचाए, आज हामी अडेर मात्र हाम्रो भौगोलिक अखण्डता कायम हुन्छ’, उनले भने।
प्रकाशित मिति: बुधबार, जेठ २८, २०७७ ०५:५९
