काठमाडाैं । नेपालको गुमेकाे भूमि समावेश गरी जारी गरेकाे नयाँ नक्सा सहितको निशान छाप राख्न सरकारले ल्याएको संविधान संशोधन विधेयकले प्रतिनिधिसभाबाट सर्वसम्मतरूपमा सैद्धान्तिक स्वीकृति पाएको छ ।
मंगलबार बसेकाे प्रतिनिधिसभा बैठकले ७ जेठमा सरकारले जारी गरेको राजनीतिक र प्रशासनिक नक्सा संविधानको अनुसूचीमा रहेको निशान छापमा अद्यावधिक गर्नका लागि ल्याइएकाे संविधान संशोधन विधेयकलाई सैद्धान्तिक स्वीकृत गरेको हो ।
बैठकमा सरकारको तर्फबाट कानुन, न्याय तथा संसदीय मामिलामन्त्री शिवमाया तुम्बाहाङ्फेले राखेको प्रस्ताव सैद्धान्तिक छलफलपछि सर्वसम्मतिले स्वीकृत भएको हो ।
सभामुख अग्निप्रसाद सापकोटाले उक्त प्रस्तावलाई निर्णयार्थ प्रस्तुस्त गरेपछि सत्तारुढ नेकपाका साथै प्रमुख प्रतिपक्ष कांग्रेससहित राजपा र समाजवादीलगायत सबै दलका सांसदले समर्थन जनाएका थिए ।
विधेयक स्वीकृत भएसँगै विधेयकमा संशोधन भएमा पेस गर्न सांसदहरूलाई ७२ घण्टाको समय उपलब्ध भएको छ ।
सरकारले गत जेठ १८ गते प्रतिनिधिसभामा संविधानको दोस्राे संशोधन विधेयक पेस गरेको थियो ।
प्रकाशित मिति: मंगलबार, जेठ २७, २०७७ १७:५२
