काठमाडाैं । प्रमुख प्रतिपक्षी दल नेपाली कांग्रेसका नेता तथा सांसद गगन थापाले सरकारले कोरोना नियन्त्रण र रोकथामका लागि आजसम्म गरेका कामहरूको हिसाबकिताब चाहिने बताएका छन् ।
मंगलबार प्रतिनिधिसभाको बैठकमा बोल्दै सांसद थापाले कोरोनाको महामारी रोक्न भनेर सरकारले खर्च गरेको १० अर्बमा १–१ रुपैयाँको हिसाब खोज्ने बताए ।
हामी अब प्रश्न गर्छौ, उत्तर चाहन्छौँ र जवाफदेही बनाउँछौं । १० अर्ब रुपैयाँ कहाँ कहाँ खर्च भयो ? ५ वटा पिसिआर मेसिन र २५ हजार किट किन्ने अनि १० अर्बको हिसाब देखाइदिने ? १-१ रपैयाँकाे हिसाब चाहिन्छ ।
उनले राष्ट्रिय विपत्तिको बेलामा भ्रष्टाचारमा चुर्लुम्ब लिप्त हुन भनेको निर्लज्जताको पारकाष्टा भएको बताए । उनले पछिल्लो समय क्वारेन्टाइन मान्छे मार्ने थलोको रुपमा देखिएको बताए ।
उनले भने, ‘क्वारेन्टाइनमा १ लाख ६६ हजार बस्छन् भनेर प्रधानमन्त्री भनिरहनु भएको छ । क्वारेन्टाइन हाे कि मान्छे मार्ने कन्सेन्ट्रेसन क्याम्प हो ?’
‘अदालत, संसद र विज्ञले पीसीआर परीक्षणको दायरा बढाऊ भने पनि सुदूरपश्चिममा स्वाब संकलन रोकिएको छ, प्रदेश २ का दशौँ हजार मानिसहरुको रिपोर्ट नआएर छटपटाइरहेका बेला सरकारले परीक्षणको दायरा साँघुरो बनाउँदै छ’, उनले भने, ‘अब क्वारेन्टाइनमा बसेका मानिसको पिसिआर परीक्षण नगर्ने रे ? मरेको मान्छेको स्वाब संकलन नगर्ने रे । अब संक्रमित मानिसलाई १४ दिन क्वारेन्टाइनमा राखेपछि घर पठाउने बेलामा पनि परीक्षण नगर्ने रे ।’
उनले बरू परीक्षण नै नगरे १ जना पनि संक्रमित नदेखिने भन्दै सरकारमाथि व्यंग्य गरे । उनले भने, ‘सरकारले यसो गरे हुन्छ, परीक्षण नै बन्द गर्दिने, अनि नेपाललाई कोरोना मुक्त देश भनिदिने, परीक्षण नै नभएपछि संक्रमित १ जना पनि देखिँदैन ।
प्रकाशित मिति: मंगलबार, जेठ २७, २०७७ ०६:५६