काठमाडाैं । नेपालको नयाँ नक्साअनुसार निशान छाप बनाउने संविधान संशोधन विधेयकमाथि मंगलबार प्रतिनिधिसभामा छलफल हुँदै छ ।
संघीय संसद सचिवालयको सम्भावित कार्यसूचीमा कानुनमन्त्री डा शिवमाया तुम्बाहाम्फेले उक्त विधेयक विचार गरियोस् भन्ने प्रस्ताव प्रस्तुत गर्ने उल्लेख छ ।
कालापानी, लिपुलेक, लिम्पियाधुरा, कुटी, नाभी, गुन्जी लगायतका भूमि समेटेर नक्सा जारी गरेपछि अद्यावधिक नक्सा मिलानका लागि संविधान संशोधन गर्न लागिएको हो ।
आज विधेयकमा सैद्धान्तिक छलफल हुने छ । छलफलमा उठेका प्रश्नको कानुनमन्त्री तुम्बाहाङ्फेले जवाफ दिने छिन् ।
छलफलपछि विधेयक संशोधनका लागि अगाडि बढ्ने छ । सांसदहरूले सरकारले ल्याएको नयाँ निशान छापमा परिवर्तनका लागि ७२ घन्टाभित्र संशोधन प्रस्ताव दर्ता गराउन पाउँछन् ।
संविधान संशोधन विधेयक संसदको २ तिहाइ बहुमतले पारित भएपछि राष्ट्रियसभामा जान्छ । राष्ट्रिय सभाले पनि २ तिहाई मतले पारित गर्नुपर्छ ।
दुवै सदनबाट पारित भएपछि विधेयकलाई प्रमाणीकरणका लागि राष्ट्रपतिसमक्ष पेस हुने छ । राष्ट्रपतिबाट प्रमाणित भएपछि संविधान संशोधन हुन्छ ।
प्रकाशित मिति: मंगलबार, जेठ २७, २०७७ ०६:१५
