काठमाडौं । पूर्वप्रधानमन्त्री डा. बाबुराम भट्टराईले जातीय विभेद अन्त्य गर्न दलित शब्द हटाउनुभन्दा सबैले दलित शब्द प्रयाेग गर्नुपर्ने सुझाव दिएका छन् । यसका लागि सबैले आ–आफ्नाे जात/थर बदल्न उनले प्रस्ताव गरे ।
सरकारले प्रस्तुत गरेको आगामी आर्थिक वर्षको बजेटमाथि आइतबार प्रतिनिधिसभामा भएको छलफलमा भाग लिँदै उनले यस्तो बताएका हुन् ।
श्रमिक र सिल्पी दलित समुदायलाई हेपेर, अपमानित गरेर देश अघि नबढ्ने उनले बताए । श्रम गर्नेलाई हेपेर दलित भनेर हुन्छ ? अहिले पनि जातीय छुवाछुतका आधारमा यसरी प्रताडित गर्न पाइन्छ ? , उनले भने, बरु यो छुवाछुत प्रथा हटाउन सबैले एकै थर लेखौं । म पनि बरु बाबुराम भट्टराई कामी भनेर लेख्न तयार छु ।
उनले रुकुममा जातीय विभेदका नाममा गरिएको ५ युवकको हत्यालाई प्रतिक्रान्तिको संज्ञा दिए । क्रान्तिको आधार इलाका रुकुममा त्यत्रो प्रतिक्रान्ति हुन्छ भने देश कहाँ जाँदै छ ? , उनले प्रश्न गरे, हामीले यी बेथितिलाई हटाउनैपर्छ । एउटै झट्कामा किन भत्काउन सक्दैनौं तर सबैले साझा प्रयास गरौं ।
यसैगरी भट्टराईले एकपटकलाई फेरि सम्पत्तिको स्वघोषणा गर्न दिनुपर्ने बताए । ‘सम्पत्ति स्वयं घोषणा गर्न दिऔं, कालोसेतो नभनौं एकचोटीलाई’ उनले भने ‘सबैले सम्पत्ति अभिलेखीकरण गरौं । त्यो गर्यो भने राजस्व बढ्छ ।’
प्रकाशित मिति: आइतबार, जेठ १८, २०७७ ०७:२६