नेपाल कम्युनिस्ट पार्टी (नेकपा) ले संसदबाट एमसिसी अनुमोदन नहुँदासम्म त्यसअन्तर्गतका कामलाई तत्काल रोक्ने निर्णय गरेको छ ।
शनिबार बसेको नेकपा सचिवालय बैठकले संसदबाट एमसिसी अनुमोदन हुने/नहुने निर्णय नहुँदासम्म एमसिए नेपालअन्तर्गतका काम अहिलेलाई स्थगित गर्ने निर्णय गरेको हो ।
पार्टी प्रवक्ता नारायणकाजी श्रेष्ठका अनुसार संसदबाट सम्झौता अनुमोदन नभइसकेको अवस्थामा एमसिएका कामहरु सम्झौता अनुमोदन भएपछि मात्रै गर्न सकिने सहमति बैठकमा भएको हाे ।
यसबारे प्रधानमन्त्री केपी शर्मा ओलीले बुझेर आवश्यक निर्देशन दिने श्रेष्ठको भनाइ छ। प्रवक्ता श्रेष्ठका अनुसार बैठकमा अर्थमन्त्री खतिवडाले बजेटमा एमसिसी किन समावेश गरिएको भन्नेबारे प्रष्ट्याएका थिए ।
‘कार्यदलले दिएको प्रतिवेदन अध्ययन गरेर छिटै गम्भीर छलफल गर्ने र आवश्यक निर्णयमा पुग्ने निर्णय भएको छ,’ श्रेष्ठले भने, ‘आपसी छलफल गरी अध्यक्षद्वयले सचिवालय बैठकको अर्को मिति तय गर्नु हुनेछ।’
एमसीसीबारे नेकपाले गत माघमा सचिवालय सदस्य झलनाथ खनालको संयोजकत्वमा बनाएको कार्यदलले दिएको प्रतिवेदन अध्ययन गर्ने पनि निर्णय भएको छ। उक्त कार्यदलले यथास्थितिमा एमसिसी लागू गर्न नहुने सुझाव दिएको थियो।
विवादित बनेको अमेरिकी सहयोग एमसिसी सम्झौता संसद्बाट पारित नहुँदै सरकारले अनुदान रकमलाई आर्थिक वर्ष ०७७/७८ को बजेटमा समेटेपछि नेकपाभित्र विवाद सिर्जना भएको हो ।
वरिष्ठ नेता माधवकुमार नेपाल, झलनाथ खनाल, प्रवक्ता श्रेष्ठलगायतले पार्टीको निर्णयबिनै विवादित रहेको एमसिसी परियोजना तोकेरै बजेटमा ल्याइएको भन्दै तत्काल बैठक बोलाउन आग्रह गरेका थिए ।
प्रकाशित मिति: शनिबार, जेठ १७, २०७७ ०८:२१