काठमाडौं । संविधान संशोधन विधेयक प्रतिनिधिसभाको सम्भावित कार्यसूचीबाट हटाइएको छ ।
कानुन मन्त्री शिवमाया तुम्बाहाम्फेले आज दिउँसो २ बजे बस्ने बैठकमा संविधान संशोधनको प्रस्ताव पेस गर्ने कार्यसूची रहेकोमा अन्तिम समयमा संसद् सचिवालयले त्यसलाई हटाएको छ ।
सरकारले लिम्पियाधुरा, लिपुलेक र कालापानीलाई समेटेर जारी गरेको नक्सा स्वीकृत गर्नेगरी संशाोधन विधेयक तयार गरेको छ। जसलाई संसदले पारित गर्नुपर्छ।
तर, सरकारले संसदमा प्रतिनिधित्व गर्ने दलका प्रमुखसँगको बैठकपछि आजको कार्यसूचीबाट हटाउन सभामुखलाई आग्रह गरेको हो ।
मंगलबार प्रधानमन्त्री केपी शर्मा ओलीले संविधान संशोधनमा सबै दलहरूबीच सहमति गर्नका लागि सर्वदलीय बैठक बोलाएका थिए ।
बैठकमा कांग्रेसले तत्काल निर्णय गर्न नसकिने बताएको थियो । उसले केन्द्रीय समिति बैठकले संविधान संशोधनबारे निर्णय लिने जानकारी दिएको थियो भने राजपा र समाजवादीले संविधान संशोधनमा आफ्ना माग पनि सम्बोधन हुनुपर्ने अडान दोहोर्याएका थिए ।
प्रकाशित मिति: बुधबार, जेठ १४, २०७७ ०८:१६
