काठमाडौं । नेपालको सुदूरपश्चिम प्रदेशको पश्चिमी सीमातर्फको विवाद उत्कर्षमा रहेका बेला रौतहटको सीमावर्ती क्षेत्रमा भारतले एकलौटी रुपमा बाँध निर्माण गरिरहेको छ ।
रौतहटको ईशनाथ नगरपालिका वडा नम्बर १ बन्जरहामा रातारात पानीको बहाव समेत अवरुद्ध हुने गरी भारतले दशगजा क्षेत्रमा सडकको नाममा बलियो बाँध निर्माण गरिरहेको छ ।
सत्तारुढ नेपाल कम्युनिस्ट पार्टी (नेकपा) प्रदेश २ का अध्यक्ष प्रभु साहले भारतद्वारा सीमा अतिक्रमण गरी एकलौटी रुपमा दशगजा क्षेत्रमै पानीको बहाव रोक्ने गरी बलियो बाँध निर्माण गर्न थालेपछि सरकारको गम्भीर ध्यानाकर्षण गराएका छन् ।
‘भारतीय पक्षले एकलौटी नेपाल–भारत सीमा क्षेत्रमा रहेको रौतहटको ईशनाथ नगरपालिका वडा नम्बर १ बन्जरहामा रातारात पानीको बहाब समेत अवरुद्ध हुने गरी दशगजा क्षेत्रमा सडकको नाममा मजबुत बाँध बनाइरहेको घटनाप्रति सिंगो मुलुकको गम्भीर ध्यानाकर्षण हुन जरूरी छ’, साहले सामाजिक सञ्जाल फेसबुकमा लेखेका छन् ।
कोरोना भाइरसको महामारीले विश्वका साथै नेपाल समेत महासंकट र लकडाउनको संबेदनशिल जटिलताबाट गुज्रिरहेको समयमा भारतद्वारा एकलौटी रुपमा दशगजा क्षेत्रमै पानीको बहान रोक्ने गरी बाँध निर्माण गर्न थालेपछि उनले विरोध गरेका हुन् ।
‘भारतीय पक्षद्वारा अवैधानिक एवं अमानवीय ढंगले एकलौटी रुपमा भइरहेको निर्माण कार्यलाई तुरुन्त रोक्न तथा यी र यस्ता गम्भीर चुनौतीपूर्ण विषयहरुलाई तत्काल उच्च स्तरको कुटनीतिक पहल मार्फत समाधान गर्न सम्बन्धित सबै पक्षहरुसँग जोडदार माग गर्दछु’, साहले भनेका छन् ।
अहिले सुदूरपश्चिम प्रदेशको पश्चिमी क्षेत्रको लिपुलेक, लिम्पियाधुरा, कालापानी क्षेत्रको विषयमा नेपाल र भारतको बीचमा विवाद चलिरहेको छ । दुवै देशले यी क्षेत्र आफ्नो भन्दै विवाद गरिरहेकै बेला भारतले रौतहटस्थित दशगजा क्षेत्रमै बलियो बाँध निर्माण सुरु गरेको छ ।
पानी पर्ने बेलामा पानीको बहाव नै रोक्ने गरी भारतले दशगजा क्षेत्रमा बाँध निर्माण गरिरहेको छ । जसका कारण नेपालतर्फको बस्ती पूरै डुबानमा पर्ने निश्चित छ । यसलाई समयमै नरोकेमा नेपाली जनता बर्खाको बेलामा थप कष्टकर जीवन जिउन बाध्य हुने छन् ।
प्रकाशित मिति: आइतबार, जेठ ११, २०७७ १३:३६
