काठमाडौं । प्रतिनिधिसभाको बजेट अधिवेशनको पहिलो बैठकमा बोल्दै राष्ट्रिय जनता पार्टीका नेता राजेन्द्र महतोले दुई तिहाइको सरकारले दुई वर्षको अवधिमा दुई कौडीको पनि काम नगरेको आरोप लगाएका छन् ।
उनले संसदको पहिलो अधिवेशनमा दुई तिहाइको सरकारले देशमा समृद्धि ल्याउला, संविधानले पूर्णता पाउला, सबै क्षेत्रका जनताले अधिकार पाउलान् भन्ने सोचेर आफूहरू खुसी भए पनि २ वर्ष पुग्दा त्यसमा कुनै काम नभएको आरोप लगाए ।
‘संसद अपहरण गर्ने ? विपक्षी तह लगाउने रे । जनताको काम नगर्ने सरकार कुर्सी जोगाउन चाहिँ सिपालु रहेछ,’ उनले भने । उनले दुई तिहाइको सरकार बन्दा जनतामा विकास र समृद्धि पाइएला, संविधानले पूर्णता पाउला भन्ने आशा भएपनि अहिले जनता निराश भइसकेको बताए ।
‘सुरुमा हामीले पनि सरकारलाई समर्थन गरेकै हो । तर, अहिले नेपाल र नेपाली पीडित भएका छन् र प्रश्न उठाउन मन लागेको नेपाली जनताले के पाए ? सपना जुन देखेका थियौं ? सुशासन पायौं ? समृद्धि पायौं ? संविधानले पूर्णता पायो ? खोसिएका अधिकार पायौं ?,’ उनले प्रश्न गरे ।
‘जनता महामारीबाट पीडित छ, खान पाएको छैन, स्वास्थ्यकर्मीले सामग्री पाएको छैन,’ महतोले भने, ‘सरकार अर्कै धन्दामा लागेको छ । पार्टी फोर्ने, सांसद चोर्ने धन्दा के हो ? यसले जनताको पीडा कम हुन्छ ? अपहरणकारीलाई कारवाही गरिदेऊ भनेर जाँदा जाहेरी नलिने ! यो हुकुमी शासन कहिले आयो ?
प्रकाशित मिति: शुक्रबार, वैशाख २६, २०७७ ११:३३