काठमाडौं । सरकारले जारी लकडाउनकाे अवधि बढाउने तयारी गरेको छ । त्यसका लागि बुधबार बिहान मन्त्रिपरिषद्को बैठक बस्दै छ ।
बिहीबार लकडाउनकाे अवधि सकिने भएकाले बुधबार ११ बजेका लागि मन्त्रिपरिषद् बैठक बाेलाइएकाे छ ।
मंगलबार प्रधानमन्त्री केपी शर्मा ओलीसमेतको उपस्थितिमा बसेको कोरोना रोकथाम तथा नियन्त्रण उच्चस्तरीय समन्वय समितिको बैठकले सरकारले गर्दै आएको लकडाउनलाई निरन्तरता दिन सुझाव दिएको थियाे ।
बैठकले अहिलेसम्म सरकारले लिएका नीतिले संक्रमण रोकथाममा सफलता प्राप्त भएको निष्कर्ष निकाल्दै संक्रमणलाई रोक्ने र शून्यमा झार्ने प्रयासमा सबै लागिरहने विषयमा छलफल गरेको थियो ।
बैठकमा प्रधानमन्त्री ओलीले लकडाउन खुकुलो पार्ने अवस्था नरहेको बताएका थिए । भारतमा पनि संक्रमण तीव्र गतिमा फैलिरहेको र नेपालमा पनि जोखिम नघटेको हुँदा लकडाउन खुकुले बनाउने अवस्था नरहेकाे ओलीकाे भनाइ थियाे ।
सरकारले पहिलो पटक चैत ११ गते लकडाउन गर्ने निर्णय गरेको थियो । त्यसपछि पटक पटक थप गर्दै वैशाख २५ गतेसम्म कायम गरिएकाे छ ।
प्रकाशित मिति: बुधबार, वैशाख २४, २०७७ ०२:३४